काठमाडौं । पाल्पामा बस दुर्घटना हुँदा एकजनाको मृत्यु भएको छ । ३४ जना घाइते छन् । आज बिहान करिब सवा ९ बजे तिनाउ गाउँपालिका–५, जोडधारामा लु१ख ५९ ५६ नम्बरको बस दुर्घटना भएको हो ।

दुर्घटनामा रुपन्देहीको देवदह नगरपालिका–३, सूर्यपूराकी अन्दाजी ३५ वर्षीया राधिका पौडेलको मृत्यु भएको जिल्ला प्रहरी कार्यालय पाल्पाका प्रवक्ता एवं डीएसपी सुरेन्द्र थापाले जानकारी दिए ।

उनका अनुसार घाइतेमध्ये ६ जनाको अवस्था गम्भीर छ । घाइते सबैको प्रभासस्थित लुम्बिनी मेडिकल कलेजमा उपचार भइरहेको छ ।

“एकजनाको मृत्यु भएको छ । ६ जना सिकिस्त छन् । ३४ जना घाइतेको लुम्बिनी मेडिकल कलेजमा उपचार भइरहेको छ,” उनले बाह्रखरीसित भने, “चालक समेत घाइते छन् । दुर्घटनाको कारण खुलेको छैन ।”

बुटवलबाट बागलुङको हटियातर्फ जाँदै गरेको बस दुर्घटना भएको हो ।