काठमाडौं । लिभरपुलका समर्थकको अपेक्षा साकार नभए पनि पछिल्लो वर्ष यही समयमा इंग्लिस फुटबलको अभुतपूर्व ‘क्वाड्रापल’ जित्ने सपनाको नजिकको साक्षी बन्दै थिए । यद्यपि, लिभरपुलका समर्थकको यो सपनाले सफलता पाएन ।
पछिल्लो सिजन ऐतिहासिक सफलताको नजिक रहेको लिभरपुलको जारी सिजनको कहानी भने निकै फरक छ । योर्गानको क्लोपको प्रशिक्षणमा रहेको लिभरपुल एउटा उपाधि जित्ने सम्भावनाबाट पनि तल झरिसकेको छ । र, लिगमा शीर्ष चारमा पर्न पनि संघर्षरत छ । लिभरपुल जारी सिजनमा प्रिमियर लिगको नवौं स्थानमा छ । जुन शीर्ष स्थानको आर्सनलभन्दा २१ अंक पछि हो । अर्को सिजन च्याम्पियन्स लिग खेल्ने सपनालाई कायम राख्न शीर्ष चारमा पुग्नुपर्छ । तर, यसका लागि लिभरपुल १० अंकले पछि छ । आइतबार ब्राइटनसँग नाटकीय पराजय बेहोरेपछि लिभरपुलको एफए कपको उपाधि रक्षा यात्रामा पनि पूर्णविराम लागिसकेको छ ।
पछिल्लो केही हप्तायता लिभरपुलले ब्राइटनसँग पराजय बेहोरेको यो दोस्रो पटक हो । ब्राइटन लिगमा पनि लिभरपुलभन्दा तीन स्थान माथि छ ।
“यो सिजन कतै पनि राम्रो हुन सकिरहेको छैन,” काओरु मिटोमाले इन्जुरी समयमा गरेको उत्कृष्ट निर्णायक गोलमा ब्राइटनसँग पराजय बेहोरेपछि लिभरपुलका कप्तान एन्डी रोबर्टसनले भने ।
“सिजनको सुरुमा हामी नयाँ सुरुआत चाहन्थ्यौं । तर, आशाअनुरुप हुन सकिरहेको छैन । हामी निकै खराब स्थितिमा छौँ । लिगमा हामी राम्रो देखिरहेका छैनौँ । अहिले हामी दुवै कपबाट बाहिरिएका छौँ ।”
लिभरपुलमा के गलत भइरहेको छ ?
पछिल्लो सिजनको ‘क्वाड्रापल’ यात्राको थकित तालिकाले पक्कै पनि लिभरपुलको संघर्षमा भूमिका खेलेको छ । ६३ खेलको सिजन र प्रत्येक खेलको दबाब कुनै पनि टिमलाई प्रभावित बनाउन र संघर्षमा राख्न यत्ति नै पर्याप्त छ । यसको प्रभाव मनोवैज्ञानिक र शारीरिक दुवै रुपमा देखिन्छ । यो कुरालाई लिभरपुलका मिडफिल्डर थियागो अल्कान्टाराले पनि स्वीकार गरेका छन् । उनले हालैमात्र चार उपाधिको नजिक रहँदा लिग कप र एफए कपको उपाधि जित्दा प्रिमियर लिगको अन्तिम दिन र च्याम्पियन्स लिगको फाइनलमा पराजित हुनु स्वीकार गर्न निकै गाह्रो कुरा रहेको प्रतिक्रिया दिएका थिए ।
इन्जुरी पनि लिभरपुलको खराब सिजनको प्रमुख कारक तत्व हो । यस सिजन क्लोपले कठिनले आफ्नो उत्कृष्ट–११ लाई मैदान उर्तान पाएका छन् । यस अवधिमा पेरिसमा भएको रियाल मड्रिडविरुद्धको रक्षापंक्ति एकपटक मात्र एकसाथ मैदान उत्रिएको छ ।
फरवार्ड मोहम्मद सालाह पछिल्लो सिजनको जस्तो प्रभावकारी देखिएका छैनन् । पछिल्लो सिजन फरवार्ड लाइनमा मोहम्मद सालाहसँगै रहेका अरु दुई निकै खतरनाक सावित भएका थिए । रोवर्टो फिर्मिन्हो र बायर्न म्युनिखमा अनुबन्धित भएका साडियो माने प्रभावकारी देखिएका थिए ।
पछिल्लो जनवरीमा पोर्टोबाट लिभरपुल अनुबन्धित भएका लुइस डियाज निकै प्रभावशाली देखिएका थिए । तर, हाल उनी घाइते छन् । ८५ मिलियन पाउन्डमा अनुबन्धित भएका डार्विन नुनेज आशाअनुरुपको प्रभावकारी सावित भएका छन् ।
पछिल्लो सिजन ‘क्वाड्रापल’को नजिक पुग्न महत्वपूर्ण सावित भएका लिभरपुलको मिडफिल्डर यस सिजन सोही लयलाई निरन्तरता दिन कठिन मिहिनेत गरिरहेको छ । युवा मिडफिल्डर न्याबी केइटा र एलेक्स अक्सलेड क्यामबर्लिन पनि एकरुपका साथ एन्फिल्डमा प्रभाव देखाउन सकेका छैनन् ।
क्लोपले ब्राइटनविरुद्ध नियमित कप्तान जोर्डन हेन्डरसनको स्थानमा स्टेफानो बाजसेटिकलाई उतार्दा उपकप्तान जेम्स मिल्नर, स्टालवार्ट फाबिन्हो र अक्सलेड क्यामबर्लिनलाई पनि पहिलो रोजाइमा राखेनन् । तर पनि यो टिम र प्रशिक्षकसँग सन् २०२३ मा खेलेका ६ खेलमध्ये एक खेलमात्र जितेको वास्तविकताभन्दा पक्कै पनि धेरै क्षमता छ । “यसमा कसैले पनि कोही खेलाडीप्रति औला देखाउन सक्दैनन् । हाम्रो वर्तमान योभन्दा ठूलो कुराको परिणाम हो,” रोबर्टसनले थपे, “हामी गोलमा पूर्ण विश्वस्त देखिएका छैनौँ । र, रक्षापंक्तिमा पनि टिम केही खुला देखिएको भने भन्न सकिन्छ । आजको खेलभन्दा अघि हामीले दुई क्लिन सिट राखेका थियौं । तर, आज हामीले दुई गोल बेहोर्यौं ।”
उनी आफ्नो विश्वास फर्काउन आवश्यक रहेको बताउँछन् । “यो गरेर देखाउँन भन्दा भन्न सजिलो छ । हामीले हाम्रो विश्वास फिर्ता ल्याउन सकेमा मात्र आगामी दिनमा सकारात्मक नतिजा प्राप्त गर्न सक्छौं,” उनले अगाडि थपे ।
लिभरपुलले अरु महिनामा प्रवेश गर्नुअघि आफ्नो विश्वास फिर्ता ल्याउन आवश्यक छ । फेब्रुअरीमा लिभरपुलले एकै सहरको अर्को प्रतिद्वन्दी एभर्टनविरुद्ध, च्याम्पियन्स लिगमा छनोट हुने लक्ष्यसाथ अघि बढिरहेको न्युक्यासल युनाइटेड र च्याम्पियन्स लिगमै साविक विजेता रियाल मड्रिडविरुद्ध खेल्दै छ ।
ब्राइटनविरुद्धको खेलमा केही सकारात्मक कुराहरु देखिए पनि आफ्नो टिमले अझै धेरै कुराहरुमा सुधार गर्न आवश्यक रहेको क्लोप बताउँछन् । “हामीले शारीरिक हाउभाउमा पनि सुधार गर्न आवश्यक छ । केही केटाहरूले अझ धेरै राम्रो गर्न आवश्यक छ,” क्लोपले भने, “पछिल्लो पटक यही भएको खेलमा हामीले जित निकाल्न सकेका थिएनौं । तर, आज हामीले जितेको भए त्यसमा आश्चर्य मान्नुपर्ने कुनै कारण हुँदैनथ्यो ।”
एफए कप ‘टाई’भन्दा पहिले क्लोपले लिभरपुलको संघर्षबीच आफ्नो बचाउ गरेका थिए । क्लोपले आफू रातारात खराब प्रबन्धक बन्न नसक्नेमा जोड दिएका थिए । तर, ‘क्वाड्रापल’ जित्ने लिभरपुलको इतिहासमा सबैभन्दा ठूलो अभियानमध्येको यसपछिको नयाँ सिजन खराब हुनु लिभरपुलका लागि सबैभन्दा सबैभन्दा ठूलो निराशा बन्न सक्नेछ ।
(बीबीसीमा प्रकाशित स्टोरीको भावनुवाद)