काठमाडौं । चलचित्र निर्माता संघले नाम मात्रको सेलिब्रिटी कार्ड मान्य नहुने जनाएको छ । चलचित्र विकास बोर्डले सेलिब्रिटी कार्ड वितरण गर्ने भन्दै लिखित सुझाव मागसहित पत्राचार गरेपछि संघले सुविधायुक्त कार्ड मात्र मान्य हुने सुझाव दिएको हो ।
विकास बोर्डले यसअघि विशिष्ट श्रेणीका कलाकारको परिचयपत्र उपलब्ध गराएको आधारमा राज्यबाट विभिन्न सुविधा प्राप्त गर्ने जनाएको थियो । तर, त्यो खासै कार्यान्वय भएको थिएन ।
“यसअघि पनि विशिष्ट श्रेणीका कलाकारको परिचयपत्र प्राप्त कलाकारलाई राज्यले सुविधा दिने भनेको थियो । तर, त्यो कार्यान्वयन नै हुन सकेन,” चलचित्र निर्माता संघका महासचिव सुनीलकुमार थापाले भने, “त्यस्तै हो भने यसको काम छैन । तर, यसलाई गम्भीरताका साथ लिएर कार्यान्वयन गर्ने हो भने यो पारदर्शी र काम गर्ने कलाकार मात्रै यो र्गीकरणमा पर्नुपर्ने हाम्रो सुझाव छ ।”
तीस वर्ष काम गरेको व्यक्तिलाई विशिष्ट श्रेष्णीको कलाकारको परिचयपत्र दिने भनिए पनि त्यो पारदर्शी नभएको भन्दै धेरैको गुनासो रहेको थियो । संघले यस विषयमा निष्क्रिय भएका व्यक्तिभन्दा पनि सक्रिय व्यक्तिलाई समेटिनुपर्ने सुझाव दिएको छ ।
“एउटा चलचित्र बनाएको वा खेलेको भरमा सेलिब्रिटी कार्ड लिनु भएन । कम्तीमा पछिल्लो तीन वर्षमा चलचित्रमा काम गरेको हुनुपर्छ भन्ने हाम्रो सुझाव छ,” सुनील भन्छन्, “सेलिब्रिटी कार्ड दिएर मात्रै हुँदैन, त्यसको कार्यान्वयन पनि हुनुपर्छ । विमानस्थलमा भीआईपीकक्ष प्रयोग गर्न पाउनुपर्छ भन्ने संघको सुझाव छ ।”
सेलिब्रिटी पास देखाएर सिंहदरबारमा सहजै प्रवेश पाउनुपर्ने माग पनि संघको छ ।
बोर्डले केही संशोधन तथा परिमार्जन गर्दै सेलिब्रिटी कार्डको व्यवस्था गर्न लागेको छ । सेलिब्रिटी कार्ड पाउने कलाकारको नाम गोरखापत्रमा नै निकालेर नै कार्यान्वयन गर्ने तयारीमा बोर्ड रहेको बताइएको छ ।
यो पनि पढ्नोस्–
यी कलाकार जसले विमानस्थलको भीआईपी कक्ष प्रयोग गर्न पाउनेछन्