काठमाडौं । इंग्लिश प्रिमियर लिग फुटबलमा साबिकको बिजेता चेल्सी बराबरीमा रोकिएको छ । लिग अन्तर्गत आइतबार राति भएको खेलमा १० खेलाडीमा सिमित चेल्सी आर्सनलसँग गोलरहित बराबरीमा रोकिएको हो ।

चेल्सीको घरेलु मैदान भएको खेलमा दुवै टोलीले पाएको मौका गुमाउदा बराबरी खेल्दै अंक बाडेका हुन् । स्टामफोर्ड ब्रिजमा बल पोजिसनमा पकड जमाएपनि चेल्सीले आर्सनलबिरुद्ध गोल गर्न सकेनन् । चेल्सीले आर्सनलबिरुद्ध ४ उत्कृष्ट प्रहार गरेपनि गोल गर्न सकेनन । यस्तै आर्सनलले घरेलु टोलिबिरुद्ध २ उत्कृष्ट प्रहार गरेको थियो  ।

यता, आर्सनलले खेलको अन्तिम समयमा चेल्सी १० खेलाडीमा सिमित भएपनि फाइदा लिन सकेन । खेलको ८७ औं मिनेटमा चेल्सीका डिफेन्डर डेभिड लुइज रातो कार्ड पाएपछि मैदानबाट बाहिरिएका थिए । आर्सनलका सीड कोलासिनाकलाई खराब ट्याकल गरेपछि रेफ्रीले लुइजलाई सिधै रातो कार्ड देखाएका थिए  ।

यो बराबरीपछि लिगको पाँचौ स्थानको चेल्सीले ५ खेलबाट १० अंक बनाएको छ । यता, लिगको १२ औं स्थानको आर्सनलले ७ अंक जोडेको छ । लिगको शीर्ष स्थानमा म्यानचेस्टर सिटी रहेको छ ।