रोयटर्स । जापान, बेलायत र इटालीले संयुक्त रुपमा जेट लडाकु विमान निर्माण गर्ने भएका छन् । युरोप र एसियामा भएको रचनात्मक साझेदारीमा एकैसाथ जापान, बेलायत र इटालीले विकसित जेट लडाकु परियोजनाहरू बनाउन लागेको समामचार संस्था रोयटर्सले जनाएको छ । सो परियोजना दोस्रो विश्वयुद्धपछि संयुक्त राज्य अमेरिकाभन्दा बाहिर जापानको पहिलो प्रमुख औद्योगिक रक्षा सहयोग हो ।

सम्झौताबारे तीन देशले शुक्रबार संयुक्त विज्ञप्ति जारी गरेका छन् । सम्झौताले बेलायतको नेतृत्वमा रहेको फ्युचर कम्ब्याट एयर सिस्टम प्रोजेक्टलाई जापानको एफ–एक्स कार्यक्रमको ग्लोबल कम्ब्याट एयर प्रोग्राममा मिलाएर सन् २०३५ सम्ममा एउटा उन्नत फ्रन्ट–लाइन लडाकु विमान सञ्चालनमा ल्याउने लक्ष्य राखेको छ । 

युक्रेनमा रुसको आक्रमण तथा जापान र ताइवान वरिपरि चिनियाँ सैन्य गतिविधि बढेको पृष्ठभूमिमा सम्झौताले अर्थपूर्ण रुपमा हेरिएको छ । जापानलाई आफ्नो ठूला छिमेकीको बढ्दो सैन्य शक्तिको सामना गर्न र बेलायतलाई विश्वव्यापी अर्थतन्त्रको प्रमुख चालक भएको क्षेत्रमा ठूलो सुरक्षा भूमिका दिन सो परियोजना उपयोगी हुने रोयटर्सले जनाएको छ ।