काठमाडौं । रक्षक जेरार्ड पिकेले व्यावसायिक फुटबलबाट सन्यास लिएको खेलमा बार्सिलोनाले शनिबार राति स्पेनिस ला लिगामा अल्मेरियामाथि २–० को विजय हासिल गरेको छ । 

आफ्नो व्यावसायिक करियरको अन्तिम खेलमा पिकेले ८५ मिनेट मैदानमा बिताए । उनलाई आन्द्रेस क्रिष्टेनसनले प्रतिस्थापन गरेका थिए । पिकेले मैदान छोड्दा उनको टिम बार्सिलोना २–० ले अगाडि थियो । र, त्यही स्कोरमा बार्सिलोना विजयी भयो । 

बार्सिलोनाले ४८औँ मिनेटमा औसमाने डेम्बेलेको गोलबाट अग्रता लिएको थियो । ६२औँ मिनेटमा फ्रांक डी जोङले अग्रता दोब्बर बनाएका थिए । त्यही दुई गोल बार्सिलोनाको जितका लागि पर्याप्त बन्यो । 

खेलपछि ३५ वर्षे रक्षक पिकेलाई रंगशालामा उपस्थित ९२ हजार ६०५ समर्थकले बसेको ठाँउबाट उठेर लामो समयसम्म ताली बजाएर सम्मान गरेका थिए । मैदान छाड्दा पिकेले आँसु थाम्न सकेका थिएनन् । जारी सिजन बार्सिलोनाको घरेलु मैदान क्याम्प नोउमा सबैभन्दा धेरै दर्शक उपस्थित भएका थिए ।

बिदाइमा भावुक बनेका पिकेले आफु बार्सिलोनामा जन्मिएको र बार्सिलोनामै मर्ने बताए । उनले थपे, ‘‘म यहीँ जन्मिए र यहीँ मर्नेछु । म विश्वस्त छु कि भविष्यमा फेरि यहाँ आउनेछु । म बार्सिलोनालाई माया गर्छु । त्यसैले यो बिदाइ होइन ।’’

पिके सन् २००४ सम्म बार्सिलोनाको युथ खेलाडी थिए । त्यसपछि उनी म्यानचेस्टर युनाइटेडमा अनुबन्धित भए । सन् २००७/०८ सिजनसम्म युनाइटेडमा रहेका पिकेले प्रिमियर लिग र च्याम्पियन्स लिग उपाधि जितेका थिए । त्यसपछि पिके बार्सिलोना फर्किएका हुन् ।

बार्सिलोनामा हुँदा पिकेले ६०० भन्दा बढी खेल खेलेका छन् । यसबीचमा उनले आठ स्पेनिस ला लिगा, तीन च्याम्पियन्स लिग र सात कोपा डेल रे उपाधिसहित ३० ट्रफी उचालेका छन् ।

पिकेले स्पेनका लागि १०२ खेल खेलिसकेका छन् । उनले सन् २०१८ मा अन्तर्राष्ट्रिय फुटबलबाट सन्न्यास लिएका थिए । स्पेनबाट पिकेले २०१२ युरोपियन च्याम्पियनसिप र २०१० को फिफा विश्वकपको उपाधि जितेका थिए ।

जितसँगै बार्सिलोना शीर्ष स्थानमा उक्लिएको छ । बार्सिलोनाले १३ खेलमा ३४ अंक जोडेको छ । जुन दोस्रो स्थानको रियाल मड्रिडभन्दा दुई अंकले माथि हो । तथापि, रियालले एक खेल कम खेलेको छ । पराजित अल्मेरिया १३ अंकका साथ १५औँ स्थानमा छ ।