झापा । नेपाली कांग्रेसका महामन्त्री विश्वप्रकाश शर्माले २०७४ को निर्वाचन परिणाम उल्टिने बताएका छन् । झापा इलामको सिमाना बेसीबजारमा भएको कार्यक्रममा उनले अघिल्लो निर्वाचनको परिणाम आफू उमेदवार भएको क्षेत्र झापा १ सँगै देशभर नै उल्टिने बताए । 

“७० मा करिब ७०० मतले हारेँ । ७४ मा जितिन्छ कि भनेको छापामार शैलीमा दुई कमरेड मिल्दिनुभयो । ७४ सालको घटना मैले सम्झे झैँ ७९ मा अहिले उता एमालेले त्यहाँ सम्झिरहने छ ,” शर्माले भने ।
 
उनले यो निर्वाचनमा कांग्रेस पहिलो, नेकपा (एमाले) दोस्रो पार्टी हुने र नेकपा (माओवादी केन्द्र) भने तेस्रो नै हुने बताए । कांग्रेस र माओवादीको सरकार हुने पनि उनले बताए ।
 
“७४ को एमाले पहिलो भएर कांग्रेस दोस्रो भएजस्तै ७९ मा पहिलो दल कांग्रेस र दोस्रो दल एमाले र तेस्रो माओवादी हो । अब ०७४ मा जस्तै पहिलो र तेस्रो मिलेर सरकार बनेजस्तै, अब पहिलो र तेस्रो मिलेर सरकार बन्छ,” शर्माले भने ।
 
महामन्त्री शर्माले अघिल्लोपटक एमालेका अध्यक्ष केपी शर्मा ओलीको सत्ताको अहंकारले बालुवाटारबाट बाहिरिएको बताए । 

“सत्ताको घोडाबाट ओलीलाई कसैले बार्दलीमा ओरालेको माधव नेपाल र प्रचण्डले हो । उहाँको अंहकारको सत्ताको घोडालाई ओरालो लगाएकै हो,” उनले भने, “एमाले र माओवादी त चलेन, अहिलेको गठबन्धन के चल्ला भन्ने होला । तर, त्यो गठबन्धन अन्तद्वन्द्वरत् थियो । त्यो मिलेको थिएन ।”

शर्माले अहिलेको सत्ता गठबन्धनलाई सलादसँग तुलना गरे । 

“यता, हामीभित्र फरक विचार छ, यहाँभित्रको अन्तरद्वन्द्व हामी मिलाउँछौँ र पाँच वर्ष सरकार र संसद् चलाउँछौँ । सलाद जस्तो फरक काँक्रा, मुला, प्याज एकै ठाउँमा फलाउन सकिँदैन । तर, फरक फरक ठाउँबाट ल्याएर मिलाउन सक्छौँ,” उनी भन्छन्, “यो हजार मिटरको दौड हैन, लामो यात्रा हो । प्रतिगमन अन्त्य गरेर अग्रगमनमा लैजान्छौँ ।”

उनले आफूहरु पाँच वर्ष संसद् टिकाउने भनेर भोट माग्ने बताउँदै एमाले अध्यक्ष ओली त्यसमा तयार हो कि होइन भन्दै प्रश्न गरे । 

“हामी पाँच वर्ष संसद् टिकाउँछौ भनेर भोट माग्छौँ, के उहाँ केपी ओलीले त्यो प्रतिवद्धता गरेर भोट माग्न तयार हुनुहुन्छ ?,” उनले प्रश्न गरे ।

शर्माले झापा १ लाई एक नम्बर बनाउनका लागि लाग्नसमेत आह्वान गरे ।