काठमाडौं । एसोसिएट राष्ट्रका स्टारका रुपमा पहिचान बनाएका क्रिकेटर सन्दीप लामिछानेले छोटो समयमा ठूलो सफलता हात पारे । उनले हासिल गरेको सफलता लोभलाग्दो थियो ।

उमेरले २३ वर्ष लागेका सन्दीपको क्रिकेट ‘करिअर’मा तत्कालका लागि ब्रेक लागेको छ ।

बलात्कार आरोप लागेका उनलाई मुद्दाको किनारा नलागेसम्म कारागारमा राख्न काठमाडौं जिल्ला अदालतले आज आदेश दिएको छ । न्यायाधीश माधवप्रसाद घिमिरेको एकल इजलासले उनलाई पुर्पक्षका लागि थुनामा राख्ने आदेश दिएको हो ।

गत भदौ २१ मा काठमाडौंस्थित प्रहरी वृत्त गौशालामा उनीविरुद्ध नाबालिगमाथि बलात्कार गरेको उजुरी परेको थियो । सोही उजुरीका आधारमा उनी २० असोजमा पक्राउ परे । जाहेरीमा सन्दीपले ती किशोरीलाई भदौ ५ गते राति होटेल काठमाडौं इनमा लगेर बलात्कार गरेको उल्लेख थियो ।

होटेल काठमाडौं इनको सीसीटीभी फुटेजमा उनीहरू राति ११ः५५ बजे होटेल प्रवेश गरेको पुष्टि भयो । बिहान ६ः४५ मा दुवैजना सँगै बाहिर निस्किएको देखिएको थियो ।

भदौ ६ गते सन्दीप ट्वान्टी–२० क्रिकेट खेल्न केन्या प्रस्थान गरेका थिए । त्यहीँबाट उनी क्यारेबियन प्रिमियर लिग (सीपीएल) खेल्न जमैका गएका थिए ।

उनी जमैकामै रहेका बेला उनीविरुद्ध भदौ २१ गते प्रहरी वृत्त गौशालामा जाहेरी परेको थियो । सन्दीपविरुद्ध बलात्कारको आरोप लागेपछि उनलाई नेपाल क्रिकेट संघ (क्यान)ले निलम्बन गरेको थियो ।

कप्तानका रुपमा उनको क्रिकेट ‘करिअर’ एक वर्ष पनि टिकेन । उनलाई क्यानले ०७८ मंसिरमा कप्तान नियुक्त गरेको थियो ।

तत्कालीन कप्तान ज्ञानेन्द्र मल्ल र उपकप्तान दीपेन्द्र सिंह ऐरीसहितका खेलाडी अनुशासनको कारवाहीमा परेपछि सन्दीपलाई कप्तानको जिम्मेवारी दिइएको थियो ।

सन्दीपले त्यसअघि यु–१९ राष्ट्रिय टोलीको नेतृत्व गरेका थिए । उनले यु–१९ विश्वकपमा आयरल्यान्डविरुद्धको खेलमा ह्याट्रिकसमेत लिएका थिए ।

सन्दीपले विश्व क्रिकेटका ठूला लिग इन्डियन प्रिमियर लिग (आईपीएल), विग ब्यास लिग, क्यारेवियन प्रिमियर लिग, पाकिस्तान सुपर लिग, टि–१० लगायत विश्वचर्चित फ्रेन्चाइज लिग खेलिसकेका छन् ।

नेपालका लागि उनले एकदिवसीय डेब्यु २०१८ अगस्ट १ मा नेदरल्याण्ड्सविरुद्धको खेलबाट गरेका थिए । टि–ट्वान्टी डेब्यु पनि २०१८ कै मे ३१ मा आईसीसी विश्व ११ बाट गरेका थिए । जुन खेल वेष्ट इन्डिजविरुद्ध थियो ।

उनले हालसम्म नेपालका लागि खेलेका ३० एकदिवसीय अन्तर्राष्ट्रिय खेलको २९ इनिङमा ६९ विकेट लिएका छन् ।

टि–ट्वान्टी अन्तर्राष्ट्रियमा ४४ खेलमा ८५ विकेट लिएका छन् । उनले एकदिवसीयमा १७० रन र टि–ट्वान्टी अन्तर्राष्ट्रियमा ५७ रन बनाएका छन् ।