काठमाडौं । स्कुलबसको झ्यालबाट टाउको बाहिर निकाल्दा रुखमा ठोक्किएर एक बालकको मृत्यु भएको छ । काठमाडौंको लाजिम्पाटस्थित बेष्ट इल्मेन्ट्री मन्टेश्वरी स्कुलमा अध्ययनरत १३ वर्षीय बालकको उपचारका क्रममा मृत्यु भएको हो ।

काठमाडौं प्रहरी परिसरका प्रवक्ता एसपी दिनेश मैनालीका अनुसार स्कुलकै बा १ क ४६४२ नम्बरको बसको झ्यालबाट टाउको बाहिर निकाल्दा गेट नजिकैको रुखमा ठोक्किएर गम्भीर घाइते भएका थिए ।

घाइते बालकको उपचारका लागि तत्काल स्कुल व्यवस्थापनले त्रि.वि. शिक्षण अस्पताल महाराजगञ्जमा पठाएको थियो । सोही क्रममा गएराति २ बजे मृत्यु भएको एसपी मैनालीले बताए ।

प्रहरीले बससहित बस चालक रोशन अधिकारीलाई पक्राउ गरेको छ । घटनाको थप अनुसन्धान प्रहरी वृत दरबारमार्गबाट भइरहेको छ ।