![कांग्रेसको घोषणापत्र : अब ४० प्रतिशत व्यावसायिक शिक्षा, निःशुल्क गर्न भौचर प्रणाली](https://12khari.top/uploads/posts/adkfmg1667123610.jpg)
काठमाडौं । नेपाली कांग्रेसले अबका दिनमा ४० प्रतिशत व्यावसायिक शिक्षा दिने प्रतिबद्धतासहित घोषणापत्र सार्वजनिक गरेको छ ।
शिक्षा र स्वास्थ्य निःशुल्क हुने घोषणा गरेको कांग्रेसले निजीमा विद्यार्थीले तिरेसरह सार्वजनिक शिक्षामा राज्यले लगानी गर्ने नीति लिने भन्दै बेरोजगारी समस्या समाधानका लागि ४० प्रतिशत व्यावसायिक शिक्षा दिने नीति ल्याउने जनाएको हो ।
आइतबार सानेपामा कांग्रेसको घोषणापत्र तयारी समितिका तर्फबाट आयोजित पत्रकार सम्मेलनमा शैक्षिक क्षेत्रको नेतृत्व गरेका डा. कृष्ण पौडेलले आगामी शिक्षा नीतिका विषयमा यस्तो बताएका हुन् ।
“शिक्षा ऐच्छिक हुनेरहेछ । चीनमा समेत पैसा तिरेर पढ्न पाउने व्यवस्था छ,” डा. पौडेलले भने, “भौचर प्रणालीमार्फत जाने भनेका छौँ । राज्यले एक विद्यार्थीलाई कति लगानी गर्छ, त्यतिबराबरको खर्च भौचर प्रणालीमार्फत राज्यले दिनेछ ।”
![Global Ime bank](https://baahrakhari.com/uploads/bigyaapan/30885600.gif)
उनले राज्यले गरेको लगानीअनुसारको सिकाइ उपलब्धि भए/नभएको अनुगमनको प्रणाली पनि स्थापित गरिने बताए ।
“सिकाइको संकट छ । शिक्षा पूरा गरेपछि बजारमा रोजगारी पाउन मुस्किल छ,” डा. पौडेलले भने, “त्यसैले बेरोजगारी समस्या सम्बोधन गर्न ४० प्रतिशत व्यावसायिक शिक्षामा जोड दिने भनेका छौँ ।”