दमौली । नेपाली कांग्रेसका नेता एवं तनहुँ क्षेत्र नम्बर–१ बाट प्रतिनिधिसभा सदस्य उमेदवार रहेका रामचन्द्र पौडेलले अधुरा विकासका कामलाई निरन्तरता दिन उमेदवारी दिएको बताएका छन् ।

तनहुँको देवघाट गाउँपालिकास्थित वैदी, कोटाका मतदातासँग शनिबार आयोजित भेटघाट कार्यक्रममा नेता पौडेलले विगतमा कांग्रेसले सुरु गरेका विकासका योजना अलपत्र परेकाले त्यसको निरन्तरताका लागि आफू उमेदवार बनेको बताए ।

“गत निर्वाचनमा नेकपा (एमाले)ले चुनाव जितेपछि जिल्लाको विकास निर्माण अवरुद्ध भयो । कांग्रेसको नेतृत्वमा सुरु भएका योजनाले गति लिन सकेन,” पौडेलले भने, “विकास योजनालाई निरन्तरता दिनु मेरो मुख्य उद्देश्य हो ।”

गत निर्वाचनमा जनतामा भ्रम फैलिएका कारण आफूले चुनाव हारेको भन्दै पौडेलले यसपटक जनताले मूल्यांकन गर्ने विश्वास व्यक्त गरे । “अहिले शेरबहादुर देउवा नेतृत्वको सरकार बनेपछि तनहुँमा दुई अर्ब रुपैयाँभन्दा बढी बजेट आएको छ । कांग्रेसको नेतृत्वमा विकास सम्भव छ,” पौडेलले भने ।

आउँदो मंसिर ४ गते हुने निर्वाचनका लागि पौडेलले घरदैलो अभियानलाई तीव्रता दिएका छन् । तिहारअगाडि एक चरणको घरदैलो सकाएका पौडेलले शुक्रबार मात्र पुनः गृहजिल्ला आएर घरदैलोलाई निरन्तरता दिएका छन् पौडेलले शुक्रबार व्यास नगरपालिका–३, शान्तिनगरमा घरदैलो गरेका थिए । रासस