काठमाडौं । सत्ता गठबन्धनले आगामी मंसिर–४ को निर्वाचनका लागि गठबन्धनका साझा उमेदवार तय गरेको छ । यसरी तय गर्दा काठमाडौंमा विवादित देखिएका दुई निर्वाचन क्षेत्रमा दुई प्रकारको निर्णय भएको छ । 

काठमाडौं–३ र काठमाडौं–१० मा नेपाली कांग्रेस र नेकपा (माअ‍ोवादी केन्द्र)को छुट्टाछुट्टै उमेदवारी परेका थियो । यी क्षेत्रका विषयमा सत्ता गठबन्धनका नेताहरुले निर्णय गरेका छन् । जसमा काठमाडौं–३ मा कांग्रेस उमेदवार सन्तोष चालिसेलाई नै गठबन्धनले आधिकारिक उमेदवार बनाएको छ ।

माओवादी केन्द्रका उमेदवार बद्री बजगाईंलाई भने गठबन्धनको मान्यता नदिने र उनको उमेदवारी निस्क्रिय पार्ने जिम्मा माओवादी केन्द्रलाई दिइएको छ । काठमाडौं–३ को ‘ख’मा भने मैत्रीपूर्ण प्रतिस्पर्धा हुने भएको छ । त्यहाँ नेपाली कांग्रेसका तर्फबाट विमल ठकुरी र माओवादी केन्द्रका महेश्वर फुयाल उमेदवार छन् । उनीहरुबीच मित्रवत् प्रतिस्पर्धा गर्न दिने निर्णय सत्ता गठबन्धनका नेताहरुले गरेका छन् ।

यता काठमाडौं–१० मा भने गठबन्धनकै दलहरुबीच मैत्रीपूर्ण प्रतिस्पर्धा गर्ने सहमति भएको छ । काठमाडौं १० मा ०७० को निर्वाचनमा माअ‍ोवादी केन्द्रका अध्यक्ष पुष्पकमल दाहाल प्रचण्डलाई हराएर संसद् छिरेपछि लगातार सांसद रहेका राजेन्द्र केसी उमेदवार छन् । यो क्षेत्रमा माओवादी केन्द्रका तर्फबाट अञ्जना विशंखेले उमेदवारी दिएकी छन् । गठबन्धनका शीर्ष नेताहरुले उनीहरुबीच मैत्रीपूर्ण प्रतिस्पर्धा हुन दिने निर्णय गरेका छन् । 

काठमाडौं १० अन्तर्गतको प्रदेशसभा निर्वाचन क्षेत्र ‘क’मा पनि कांग्रेसका पुकार महर्जन र माओवादी केन्द्रका दिलिप महर्जन उमेदवार छन् । उनीहरुबीच मैत्रीपूर्ण प्रतिस्पर्धा हुन दिने निर्णय गठबन्धनका नेताहरुबीच भएको छ । 

सत्ता गठबन्धनका नेताहरुको बैठकबाट संयुक्त विज्ञप्ति जारी गरी गठबन्धनका साझा उमेदवार नभएका स्थानमा मैत्रीपूर्ण प्रतिस्पर्धा गर्ने निर्णय सार्वजनिक भएसँगै उनीहरुले तयार पारेको लिस्ट पनि बाह्रखरीलाई प्राप्त भएको छ ।