चितवन । चितवनमा डेंगी सङ्क्रमितको संख्या दुई हजार नाघेको छ । जिल्ला स्वास्थ्य कार्यालय चितवनका अनुसार चालु आर्थिक वर्षमा हालसम्म दुई हजार १६४ जनामा डेंगी सङ्क्रमण पुष्टि भइसकेको छ । सो अवधिमा आठ हजार ८५३ जनामा डेंगी परीक्षण गर्दा दुई हजार १६४ जनाको रिपोर्ट पोजेटिभ आएको छ । 

जिल्ला स्वास्थ्य कार्यालयका सूचना अधिकारी राम केसीका अनुसार उनीहरूमध्ये एक हजार चार सय ५१ चितवनका छन् । जसमा ८२२ पुरुष र ६२९ महिला छन् । ४५४ सङ्क्रमित अन्य जिल्लाका हुन् भने २५९ जनाको ठेगाना नखुलेको कार्यालयले जनाएको छ । चितवनमा यो अवधिमा डेंगी सङ्क्रमणबाट तीन जनाको ज्यान गएको छ ।

चितवनका सात पालिकामध्ये सबैभन्दा धेरै डेंगी सङ्क्रमित भरतपुर महानगरपालिकाका रहेका छन् । भरतपुरमा हालसम्म ५५९ पुरुष र ४१९ महिला गरी ९७८ जनामा डेंगी सङ्क्रमण पुष्टि भइसकेको छ । 

यस्तै खैरहनी नगरपालिकामा १२४, माडीमा २८, रत्ननगरमा १९७, राप्तीमा ७९ र कालिकामा ३७ जनामा डेंगी देखिएको केसीले बताए । इच्छाकामना गाउँपालिकामा हालसम्म आठ जनामा डेंगी सङ्क्रमण पुष्टि भएको छ । अझै केही समय डेंगी सङ्क्रमण हुनसक्ने भन्दै कार्यालयले सचेत बन्न सबैलाई आह्वान गरेको छ । रासस