काठमाडौं । केही समयअघि मर्जरको सम्झौता गरेका प्रभु बैंक र सेन्चुरी कमर्सियल बैंकले चालु आर्थिक वर्ष (आव) २०७९/८० को पहिलो त्रैमासमा नाफा बढाएका छन् । गत आर्थिक वर्ष पहिलो त्रैमासको तुलनामा चालु आर्थिक वर्षको सोही अवधिमा यी दुई बैंकको नाफा औसत १२.६२ प्रतिशतले वृद्धि भएको छ ।

यी दुई बैंकको नाफा एक अर्ब दुई करोड ३५ लाख रुपैयाँ छ । जसमा प्रभु बैंकको नाफा ७० करोड ५० लाख छ । सेन्चुरी बैंकको नाफा ३१ करोड ८५ लाख रुपैयाँ छ ।

गत आवको पहिलो त्रैमासको तुलनामा चालु आवको सोही अवधिमा प्रभुको नाफा १०.७९ प्रतिशतले वृद्धि भएको छ । सेन्चुरीको नाफा १६.६२ प्रतिशत कायम छ ।

गत वर्षको पहिलो त्रैमासमा प्रभु बैंकले ६३ करोड ६३ लाख रुपैयाँ नाफा आर्जन गरेको थियो । सेन्चुरी बैंकले २७ करोड २४ लाख रुपैयाँ नाफा कमाएको थियो । यी बैंकहरूको खुद ब्याज आम्दानी र सञ्चालन मुनाफामा वृद्धि भएसँगै नाफामा वृद्धि भएको हो । खुद ब्याज आम्दानी प्रभु बैंकको ३८.७० प्रतिशतले वृद्धि भएको छ । सेन्चुरी बैंकको ६०.२२ प्रतिशतले वृद्धि भएको छ ।

यी दुई बैंक एकापसमा मर्जपछि चुक्ता पुँजी २२ अर्ब २६ करोड २६ लाख रुपैयाँ कायम हुनेछ । हाल प्रभु बैंकको चुक्ता पुँजी १२ अर्ब ७० करोड ८७ लाख रुपैयाँ छ । सेन्चुरीको नौ अर्ब ५५ करोड ३९ लाख रुपैयाँ छ ।