काठमाडौं । नवौँ राष्ट्रिय खेलकुद प्रतियोगिताको आर्चरीमा गण्डकी प्रदेश टिम च्याम्पियन बनेको छ । कुल १३ स्पर्धामा भएको प्रतिस्पर्धामा गण्डकीले सबैभन्दा धेरै ७ स्वर्ण, ४ रजत र १ कास्य गरी कुल १२ पदकसहित च्याम्पियन बनेको हो । 

दोस्रो भएको त्रिभुवन आर्मीले ३ स्वर्ण, १ रजत र ५ कास्यसहित कुल ९ पदक जित्यो । अर्को विभागीय टिम सशस्त्र प्रहरी बल (एपीएफ) क्लब तेस्रो बन्यो । एपीएफले २ स्वर्ण, ३ रजत र ३ कास्यसहित ८ पदक जित्यो । 

नेपाल पुलिस क्लबले १ स्वर्ण, २ रजत र १ काश्यसहित कुल ४ पदक जितेर चौथो बन्दा प्रदेश १ ले २ रजत जितेर पाँचौँ, सुदूरपश्चिमले १ रजत र २ कास्यसहित ३ पदक तथा वाग्मती प्रदेशले १ कास्य मात्र जितेर छैटौँ बन्यो । लुम्बिनी र एनआरएनए पदकविहीन रहे । 

बुधबार अन्तिम दिन बाँकी ६ स्वर्णका लागि भएको खेलमा रिकर्भ मेन व्यक्तिगततर्फ गण्डकीका गंगाबहादुर कुँवरले स्वर्णपदक जिते । उनले पुलिसका तिलक पुनलाई ७–१ स्कोरले पराजित गरे । तिलकले रजतपदक जित्दा एपीएफका विराट थापा कास्यपदकमा सीमित भए । गंगा र तिलक वरीयतामा पनि पहिलो र दोस्रो स्थानमै छन् । विराट पाँचौँ वरीयतामा छन् ।

रिकर्भ वुमेन व्यक्तिगततर्फ गण्डकीकी रोजिना थापा मगरले आर्मीकी मञ्जु बजगाईंलाई ६–२ स्कोरले हराउँदै स्वर्णपदक जितिन् । बजगाईंले रजतपदक जित्दा आर्मीकै ज्ञानु अवालेले कास्यपदक जितिन् । वरीयतामा भने रोजिना दोस्रोमा रहँदा मञ्जु पहिलो स्थानमा छिन् । ज्ञानु तेस्रो वरीयतामै छिन् ।

कम्पाउन्ड मेन व्यक्तिगततर्फ गण्डकीकै दुई खेलाडी फाइनलमा भिडे । जागृत गुरुङले खेमबहादुर क्षेत्रीलाई १४४–१४२ को झिनो अन्तरले हराउँदै स्वर्णपदक जिते । पराजित क्षेत्रीले रजतपदकमा चित्त बुझाउँदा सुदूरपश्चिमका सुरेश गुरुङ तेस्रो हुँदै कास्यपदकमा सीमित भए । वरीयतामा जागृत पहिलो नम्बर र खेम दोस्रो नम्बरमै छन् । सुरेश चौथो वरीयतामा छन् ।

कम्पाउन्ड वुमेन व्यक्तिगततर्फ पहिलो वरियताकी पार्षदा आचार्य (एपीएफ) पछि परिन् । दोस्रो वरियताकी आर्मीकी इमायुङ राईले १३६–१३० ले हराउँदै स्वर्णपदक जित्दा वरियतामा अघि रहेकी आचार्य रजतपदकमा सीमित बनिन् । तेस्रो वरियताकी एपीएफकी निर्मला कानवाङ राईले तेस्रो हुँदै कास्यपदक जितिन् ।

स्टान्डर्ड मेन व्यक्तिगततर्फ दोस्रो वरियताका नगेन्द्र आचार्य (नेपाल पुलिस)ले स्वर्ण पदक जिते । ¥याङकिङ राउन्डमा पहिलो नम्बरका गण्डकीका दुर्गा घर्तीमगर ६–५ स्कोरले पछि पर्दै रजतपदकमा सीमित भए । वाग्मतीका फर्माचन शेरचनले तेस्रो हुँदै कास्यपदक जिते । शेरचन पाँचौँ वरीयतामा थिए । 

स्टान्डर्ड वुमेन व्यक्तिगततर्फ एपीएफकी सोनु जया राईले प्रदेश १ की योगिता कानवाङलाई ६–४ स्कोरले हराउँदै स्वर्ण जितिन् । पराजित योगिताले रजतपदक जित्दा आर्मीकी शारदा विक तेस्रो हुँदै कास्यपदकमा सीमित भए । वरीयता निर्धारणमा शारदा दोस्रो स्थानमा छन् भने सोनु तेस्रो र योगिता चौथो स्थानमा छन् ।

कुल १३ विधाको खेलमा मंगलबार सात स्वर्ण र बुधबार ६ स्वर्णको छिनोफानो भएको हो । आर्चरीमा मधेस र कर्णालीबाहेक तीन विभागीय, एनआरएनएसहित सबै ९ वटा टोलीको सहभागिता रहेको थियो । स्टान्डर्ड (३० मिटर), कम्पाउण्ड (५० मिटर) र रिकर्भ (७० मिटर) विधामा पुरुष र महिला एकल, टिम र मिक्समा प्रतिस्पर्धा गराइएको थियो ।