नयाँदिल्ली । भारतमा आफ्नो अनियन्त्रित याैन इच्छा पूरा गर्न हत्या गरिएका दुईजना महिलाका शवका केही भाग खाएको आरोपमा तीनजनालाई पक्राउ गरिएको छ । 

 ७५ वर्षीया वृद्धालाई यौन दुर्व्यवहार गरेको आरोपमा जेल सजाय भुक्तान गरिसकेका बलात्कारका अभियुक्त मुहम्मद साफी, हाइकु कवि तथा मसाज पार्लरका मालिक भागवल सिंह र उनकी पत्नी लैला सिंहलाई प्रहरीले पक्राउ गरेको हो । 

केरला प्रहरीका अनुसार उनीहरूविरुद्ध मानव बलि दिएकाे, यातना र हत्या गरेको तथा करिब ५० वर्षीया दुई महिलाको अंगभंग गरेको र उनीहरूकाे केही भाग खाएको अभियोग लगाइएको छ ।

आराेपितविरुद्ध बुधवार मुद्दा दायर गरिएको हो । अहिलेसम्म उनीहरुविरुद्ध पदमाम र रोज्ली नामक ती महिलाको हत्या गरेको मात्र अभियोग लगाइएको छ । तर, प्रहरीले उनीहरूले अरूकाे पनि हत्या गरेको हुनुपर्ने आशंका गरेको छ ।

पदमामकी बहिनीले दिएको सूचनाको आधारमा उनीहरू पक्राउ परेका हुन् । उनले २६ सेप्टेम्बरमा अन्तिम पटक आफ्नी दिदीलाई साफीको कारमा देखेको प्रहरीलाई जानकारी दिएकी थिइन् । साफी अभियुक्त दम्पतीका तान्त्रिक गुरु रहेको बुझिएको छ । साफीले पतिको उपस्थितिमा नै लैला सिंहसँग यौन सम्पर्क राख्ने गरेको तीनैजनाले स्वीकारेका छन् । 

साफीविरुद्ध पदमामको हत्या गरेको र लैलाविरुद्ध रोज्लीको शिर छेदन गरेको आरोप लगाइएको छ । साथै लैलाको पतिलाई भने खानका लागि रोज्लीका स्तन काटकुट पारेको आरोप लगाइएको छ । 

केरला प्रहरी आयुक्तले साफी पागल र यौन दुराचारी भएको र यौन इच्छा पूरा गर्न उनी हत्या गर्नसमेत पछि नहट्ने स्वभावको भएको इन्डिया टाइम्सलाई बताएका छन् । 

नक्कली फेसबुक साइटमार्फत आर्थिक मद्दत गर्नेबारे विज्ञापन दिएर तथा आफ्नो पनि जापानी कविता ‘हाइकु’मा रुचि भएको सूचना दिएर उनले सिंह दम्पतिलाई आफूतर्फ आकर्षित पारेको देखिन्छ । अनुसन्धानबाट हत्या ६ जुन र २६ सेप्टेम्बरमा भएको पत्ता लागेको छ । 

स्थानीय प्रहरीका अनुसार साफीले चिठ्ठा बेच्ने गरेका ती महिलालाई ललाइफकाइ आफ्नो घरमा ल्याउन सिंह दम्पतिलाई निर्देशन दिएका थिए । लैला सिंहले आर्थिक समृद्धि हुने अन्धविश्वासमा रोज्लीको मासु खाएको र आफ्नो पतिले उनको जवानी कायम रहने भनिएकाले पदमामको संवेदनशील अंग खाएको स्वीकारेकी छन् । अन्य अंग सिंहको घरको बगैँचामा लुकाइएकाे अवस्थामा प्रहरीले फेला पारेको छ ।  

डेलीबिस्टबाट ।