काठमाडौं । नेपाली कांग्रेसको कार्यसम्पादन समितिको बैठक सुरु भएको छ । जारी बैठकले घोषणापत्रको मस्यौदालाई अन्तिम रुप दिने बताइएको छ । यसैका लागि कांग्रेसले आज कार्यसम्पादन समितिको बैठक बोलाएको हो ।  

आगामी मंसिर ४ गते हुने प्रतिनिधिसभा र प्रदेशसभा सदस्य निर्वाचनका लागि पार्टीको तयारी, निर्वाचनका लागि विभिन्न परिचालन समिति गठन गर्नेलगायत समसामयिक विषयमा बैठकमा छलफल हुनेछ ।   

आगामी आमनिर्वाचनका लागि कांग्रेसले महामन्त्री विश्वप्रकाश शर्माको संयोजकत्वमा गठन गरेको घोषणपत्र तयारी समितिले देशभरबाट विभिन्न उपसमितिमार्फत सुझाव सङ्कलन गरी मस्यौदा तयार गरिसकेको छ ।
     
निर्वाचनमा दलहरुका उमेदवार प्रचारमा जुटिसक्दा पनि दलले घोषणापत्र जारी नगरिसकेको अवस्थामा कांग्रेसले घोषणापत्रको मस्यौदालाई अन्तिम रुप दिन लागेको हो । निर्वाचन आयोगले मंसिर ४ गते हुने प्रतिनिधिसभा र प्रदेशसभा सदस्य निर्वाचनका लागि देशभरका सबै उमेदवारलाई यही असोज २६ गते चुनाव चिह्न प्रदान गरेसँगै सबै उमेदवार आफ्नो प्रचारप्रसारमा जुटिसकेका छन् ।