सत्तारुढ गठबन्धनबाट अलग भए पनि जनता समाजवादी पार्टी ९जसपा०का मन्त्रीहरूले पदबाट राजीनामा गरेका छैनन् । सत्तामा बसेर विपक्षी गठबन्धनबाट चुनाव लड्ने अनैतिक अभ्यास नेपाली राजनीतिमा फेरि देखियो । 
 
यस्तै अराजनीतिक अनैतिकताको उदाहरण रौतहटका एकजना उमेदवारले प्रदर्शन गरेका छन् । नेकपा (एमाले)बाट उमेदवारीको पत्र बुझेर पनि स्वतन्त्र उमेदवारी दिएर एमालेलाई उमेदवारहीन हुने गरी धोका दिए । यथार्थमा यो राजनीतिका नाममा भएको अराजनीतिक अभ्यासको निकृष्ट उदाहरण हो ।  
 
 अगिल्लो निर्वाचनका बेला अहिले सत्ताको प्रमुख साझेदार नेपाल कम्युनिस्ट पार्टी ९माओवादी केन्द्र०ले सरकारमा बस्दाबस्दै विपक्षी दलसँग गठबन्धन गरेर चुनाव लड्ने अराजनीतिक र अनैतिक अभ्यास गरेको थियो । उतिबेला माओवादी केन्द्रबाट सरकारमा रहेका मन्त्रीहरूको जिम्मेवारी खोसिएको थियो ।
 जसपाले पनि चित्त नबुझेपछि विपक्षी एमालेसँग गठबन्धन गर्नु अनुचित वा अस्वाभाविक होइन । तर, सत्तारुढ गठबन्धनविरुद्ध विपक्षीसँग तालमेल गरिसकेपछि सरकारमै बसिरहनु भने अराजनीतिक र अनैतिक कार्य हो । 
 
 यस्तै, आफूलाई चित्त नबुझे कुनै पनि व्यक्तिले स्वतन्त्र वा अर्कै दलबाट उमेदवारी दिए हुन्छ । त्यसलाई अवसरवादिता भनिएला तर अपराध वा धोका भन्न मिल्दैन । तर, कुनै दललाई धोका दिएर एउटा निर्वाचन क्षेत्रमा उमेदवारविहीन बनाउनु भने अनैतिक अपराध नै हो । 

संविधान मस्यौदा गर्दा राजनीतिक दलका नेताहरूमा यस प्रकारको अनैतिकता उत्पन्न हुने अवस्थाको कल्पना गरिएको देखिन्न । यसैले जसपाका मन्त्रीहरू वा रौतहट धोकेवाज राजनीतिकर्मीलाई अदालतबाट सजाय पनि नहोला । 
 
परन्तु, राजनीतिकर्मीको बेइमानी र अनैतिकतामा जनताको अदालतमा मुद्दा लाग्छ भने सजाय पनि जनताले नै दिनुपर्छ । यस प्रकारको अनैतिक अभ्यासमा पनि जनताले सजाय नदिने हो भने लोकतन्त्र उपहासमात्र बन्न पुग्छ । 
 
अगिल्लो निर्वाचनमा अनैतिक संस्कार प्रदर्शन गर्ने माओवादी केन्द्रका मन्त्रीलाई एमालेले स्वागत र संरक्षण गरेको थियो । अहिले पनि त्यस्तै अनैतिकता देखाउने जसपाका मन्त्रीहरूले एमालेकै संरक्षण र सहयोग पाएका छन् । सायद, यही कारणले रौतहटमा गरिएको षड्यन्त्रविरुद्ध एमालेका नेताहरू मौन प्रायः रहेको हुनुपर्छ । एमालेमात्र होइन अरू दलका नेताले समेत यस्तो अनैतिकताको निन्दा गर्नुपर्थ्यो ।
 
राजनीति गर्नेहरूले नैतिकतालाई तिलाञ्जलि दिएपछि जनतामा राजनीतिप्रति नै वितृष्णा उत्पन्न हुनु अस्वाभाविक होइन । जनताले यस्तो आक्रोश र वितृष्णा प्रकट गर्ने उपयुक्त अवसर भने निर्वाचन नै हो । अहिले मतदाताको विवेक नपुगे यही र यस्तै चक्र चलिरहन्छ । यसैले अनैतिकहरूलाई परास्त गरेर पाठ सिकाउनु जनताको पनि कर्तव्य हुन्छ ।