काठमाडौं । नेकपा (एमाले)का नेता भीम रावलले राप्रपा नेपालका अध्यक्ष कमल थापा र जसपाका अध्यक्ष उपेन्द्र यादवको नैतिकतामाथि प्रश्न गरेका छन् ।

सोमबार राति सामाजिक सञ्जालमार्फत रावलले थापाले एमालेको सूर्य चिह्न लिएर उमेदवार भएकोप्रति असन्तुष्टि जनाएका हुन् । साथै उनले जसपाले सरकारमा भएर पनि प्रतिपक्ष दल एमालेसँग तालमेल गरेकोप्रति आपत्ति जनाएका छन् । 

"राजनीतिक अनैतिकताका दुई नमुना : कमल थापाले आफू एमालेको सूर्य चिन्ह लिएर उमेदवार हुने तर आफ्ना पार्टीका अरू उमेदवारलाई तीर चिह्नमा लडाउने र उपेन्द्र यादवको जसपा गठबन्धन सरकारमा रहिरहने तर चुनावी तालमेल एमालेसँग  गर्ने ! कमल थापालाई औँल्याएर निर्वाचन आयोगले एक व्यक्ति दुई पार्टीमा रहन नसक्ने भनी सार्वजनिक रूपमा प्रष्ट्याउनुपर्ने । यस्तैलाई एमालेले महत्त्वका साथ बोक्ने ! के हुन लाग्यो !," उनले भनेका छन् ।

कम सिट मिल्ने भएपछि जसपाले सत्ता गठबन्धनलाई छोडेर एमालेसँग तालमेल गरेको छ । अर्कोतिर कमल थापा एमालेको सूर्य चिह्नबाट चुनाव लड्दैछन् ।