सफलताका सूत्र
(निबन्धसंग्रह : डा. नम्रता पाण्डे/डा. प्रद्युम्नराज पाण्डे)

डा. नम्रता पाण्डे र डा. प्रद्युम्नराज पाण्डेद्वारा लिखित उत्प्रेरक सन्देश प्रवाह गर्ने निबन्धसंग्रह बजारमा आएको छ । सकारात्मक सोच नै हरेकको जीवनका लागि अर्थपूर्ण सम्पत्ति हो । त्यही सोचले मानिसलाई कुनै न कुनै काम गर्न, निरन्तर क्रियाशील रहन उप्रेरित गरिरहन्छ । यस्तै उत्प्रेरक निबन्धहरूको सँगालो लेखकद्वय डा. नम्रता र डा. प्रद्युम्नले ल्याएका हुन्, ‘सफलताका सूत्र’ ।

कृतिको भूमिकामा प्रा. डा. भागवत ढकालले लेखेका छन्, “आजको मान्छेमा सुख–सुविधाका साधन छन्, सुख छैन । किताबका ठेली छन्, ज्ञान छैन । भोजनका परिकार छन्, भोक छैन । आलिशान भवन छन्, घरको आत्मीयता छैन । यस्ता लामा उदाहरण पेस गर्न सकिन्छ, तर पनि मान्छे छिट्टै सम्पन्न बन्न, छिट्टै विद्वान् कहलाउन, छिट्ट सुख–सुविधा आर्जन गर्न दौडिरहेको छ । लम्किरहेको छ । थोरै र नगण्य श्रमबाट ऊ विशिष्ट सफलता र सुखसयल पाउन उद्यत छ । यस दौडाइमा उसले कतिखेर आफन्त, इष्टमित्र, आफ्नो सुख–सुविधा र यावत् कुरा गुमाइसकेको हुन्छ र एक्लो निरीह बनेर मृत्युको प्रतीक्षा गरिरहेको हुन्छ ।...।”

साहित्यकार रामप्रसाद पन्त आफ्नो मन्तव्यमा लेख्छन्, “प्रस्तुत कृति ‘सफलताका सूत्र’ पढेर प्राप्त गर्न सकिने विषय थुप्रै छन्, जसमा हामी कसरी जागरुक हुने ? आध्यात्मिक ऊर्जा कसरी प्राप्त गर्ने ? जीवन जिउने कला कसरी सिक्ने ? आफूले आफैँलाई कसरी रूपान्तरण गर्ने ? आदि कुराहरू यसभित्र समाविष्ट छन् ।...।”

वाङ्मय शताब्दीपुरुष सत्यमोहन जोशी, जापानी प्राध्यापक मिचुहिरो नाकागावाका शुभकामना सन्देश समेटिएको यस कृतिमा लेखकद्वय आफ्नो भनाइमा लेख्छन्, “हामीले जे सोचेका थियौँ, त्यही बनेका छौँ र जे सोच्छौँ, भविष्यमा त्यही बन्नेछौँ । हामी विचारद्वारा जे कुरामा आकर्षित हुन्छौँ, त्यही प्राप्त गर्दछौँ । हामी जे कल्पना गर्दछौँ, त्यसकै सिर्जना पनि गर्दछौँ । विचारको बिउ जस्तो रोप्छौँ, फल त्यस्तै नै प्राप्त हुन्छ ।...।”

विचार र सफलता शीर्षकको निबन्धमा लेखिएको छ, “संघर्ष नै जितको मुख्य आधार हो । जीवन अत्यन्तै मूल्यवान छ, तर हामीले जानेर वा नजानेर यसको अवमूल्यन गरिरहेका छौँ । हामी सबै सफल हुन चाहन्छौँ, तर यसका लागि चाहिने निरन्तर अभ्यास गर्न चाहँदैनौँ । जीवनमा सफलता भनेको कुनै रोगको विरुद्ध एन्टिबायोटिक खाएजसरी प्राप्त हुँदैन ।...।”

दायित्व वाङ्मय प्रतिष्ठानद्वारा प्रकाशित १८०+४ पृष्ठको यस पुस्तकको मूल्य ४५०/– रुपैयाँ राखिएको छ ।
०००
गाईजात्रा 
(लघुकथासंग्रह : गायत्रीकुमार चापागाई)

साहित्यकार गायत्रीकुमार चापागाईको पछिल्लो कृति हो, ‘गाईजात्रा’ । यो लघुकथाहरूको संग्रह हो । कृति केही महिनाअघि सार्वजनिक गरिएको थियो ।

कविता, कथा, निबन्धका क्षेत्रमा क्रियाशील चापागाईले कृतिका बारेमा आफ्नो ‘अवधारणा’ यसरी लेखेका छन्, “...विश्वव्यापी महामारी कोरोनाको कहर । त्यही कहरमा पीडित समय । घरभित्रै लुकेर बसे पनि सिर्जनाको आँधी भने चलिरहने । ढुकढुकीमा सामाजिक सञ्जाल । प्रकाशनमा कुतकुत्याउने सम्पादकहरू–पत्रपत्रिकाका । पाइला–पाइलामा मृत्युको भय । वरिपरि विकृति र विसंगतिका चाङहरू । भाँडिएको राष्ट्र, समाज र परिवार । मैले भेटेका पात्र, घटना र परिवेश यही समाजका हुन् । टपक्क टिपेँ ।...।”

साहित्यकार खेमराज पोखरेलले भूमिकामा लेखेका छन्, “यो कृतिभित्र नेपाली समाजका लागि गायत्री मन्त्रजस्तै विविध विषयमा सुन्दर, शान्त र सुखायको सन्देश प्रवाह गरिएको छ ।...।”

कृतिभित्र चापागाईका ६४ लघुकथा समेटिएको छ । शब्दयात्रा प्रकाशनले बजारमा ल्याएको १४४+४ पृष्ठको यस संग्रहको मूल्य २००/– रुपैयाँ राखिएको छ ।
०००
सधैंसधैं
(मुक्तकसंग्रह : नवराज कार्की)

नेपाली साहित्यिकवृत्तमा परिचित नाम हो, नवराज कार्की । कवि कार्कीको पहिलो कवितासंग्रह वि.सं. २०४० सालमा प्रकाशित भएको थियो । २०३१ सालदेखि निरन्तर कविता, मुक्तक, व्यंग्यकवितामा सक्रिय रहेका उनको पछिल्लो कृति हो, ‘सधैंसधैं’ । मुक्तकहरूको यो सँगालोसँगै उनका नौ कृति प्रकाशित भइसकेका छन् ।

पुस्तकमा स्रष्टा यादव खरेल लेख्छन्, “...यस संग्रहमा २०७ वटा मुक्तक छन्, ती पनि छानिएका नमुना मुक्तक । अर्थात्, सरल तर अर्थपूर्ण र गहिरा । यी मुक्तकहरू देश, काल, परिस्थितिको सेरोफेरोमा घुम्छन् । मायाप्रीतिका साथै राजनीतिक व्यंग्य, देशप्रेम, अन्यायविरुद्ध विद्रोह आदि विषयविविधताले यो मुक्तकसंग्रह पठनीय मात्र नभएर संग्रहणीय बनेको छ ।”

सिक्किम विश्वविद्यालयकी प्रो. कविता लामा लेख्छिन्, “...कार्कीका केही मुक्तक जातगत, धर्मगत, वर्गगत तथा लिंगगत विभेदप्रति विरोध गर्दै समानताका पक्षमा उभिन्छन्, केही स्वाभिमानी, कर्मशील, कर्तव्यनिष्ठ देखिन्छन् त केही मानवीय सम्बन्ध र प्रेममा केन्द्रित छन् ।...।”

कवि कार्की लेख्छन्, “‘मुक्तक मेरो साधना हो, मेरा मुखपत्र । मैले मुक्तकमा अनेक प्रयोग र परीक्षण गरेको छु ।...।”

एउटा मुक्तकमा कार्की लेख्छन्–
खाने तँहरू
हेर्ने अरू 
अरू बोल्दैनन्
बोल्छु मै बरू (पृष्ठ – ५५)

नेपाल मुक्तक प्रतिष्ठानले प्रकाशनमा ल्याएको १००+४ पृष्ठको यो पुस्तकको मूल्य २५०/– रुपैयाँ राखिएको छ ।