श्रीनगर । भारत प्रशासित काश्मिरमा १४ वर्षपछि चलचित्र हलहरू पुनः सञ्चालन गर्न थालिएको छ ।

धेरै ठाउँमा चलचित्र देखाउन मिल्ने एउटा चलचित्र हल शनिबारदेखि सञ्चालनमा आएको छ । अरू हलहरू पनि सञ्चालनको तयारीमा रहेको बताइएको छ ।

तीन वर्ष अगाडिदेखि भारतको प्रत्यक्ष शासनअन्तर्गत आएको काश्मिरमा अहिले आएर चलचित्र हल खुल्न लागेका हुन् ।

धेरै जनधनको क्षति हुने गरी चलेको झन्डै एक दशक लामो युद्धका कारण त्यहाँका चलचित्र व्यवसायीहरू विस्थापित भएकाले चलचित्र हलहरू बन्द भएका थिए ।

अहिले चलचित्र देखाउन थालिए पनि दर्शकको संख्या भने अत्यन्त न्यून रहेको व्यवसायीहरूले बताएका छन् । ५२० सिट रहेको हलमा झन्डै एक दर्जन मात्र दर्शक रहेको उनीहरूले जानकारी दिएका छन् ।

चलचित्र प्रदर्शनीको सुरुवात गएको सेप्टेम्बर २० तारिखमा गरिएको थियो । त्यसको उद्घाटन काश्मिरका लागि भारतका उच्च प्रशासक मनोज सिन्हाले गरेका थिए । सो चलचित्र हलको सञ्चालन काश्मिरका व्यवसायीसँग मिलेर भारतीय व्यवसायीले गरेका हुन् ।

“मानिसले अझै पनि चलचित्र हेर्नेतर्फ सोचेको देखिएको छैन । उनीहरू चलचित्रबाट धेरै टाढा पुगेकाले फेरि पहिलेकै अवस्थामा ल्याउन अझै केही समय लाग्न सक्छ । त्यो स्वभाविक हो,” एक स्थानीयले भने ।

अर्का एक स्थानीयको भनाइ थियो, “चलचित्रका बारेमा आम नागरिकको फरक–फरक धारणा पाइन्छ । कतिपयले चलचित्र हेर्नुलाई राम्रो मान्छन् भने कतिपयले गलत मान्दछन् । मैले भने यसलाई प्रगतिको संकेतका रूपमा लिन्छु ।”

शनिबारको दीवाकालीन र सन्ध्याकालीन प्रदर्शनीमा कुल सिट संख्याको १० प्रतिशतभन्दा कम दर्शक आएको पाइएको छ । रासस/एपी