- नेपालकी राष्ट्रपतिलाई सर्वोच्च अदालतले संविधानमा लेखिएअनुसारको काम किन नगरेको भनेर कारण देखाउ आदेश जारी गरेको छ ।
- राष्ट्रपतिको सचिवालयबाट प्रधानमन्त्रीलाई संविधानमा व्यवस्था भएअनुसार सरकारका कामकाजको जानकारी किन नगराएको भनेर स्पष्टीकरण सोधिएको समाचार प्रकाश आएको छ ।
- प्रतिनिधि सभाका सभामुखको कार्यकाल समाप्त भइसकेको विषयमा राष्ट्रिय सभाका अध्यक्षले निर्वाचन आयोगमा पत्राचार गर्छन् ।
- संसदीय समितिका सभापतिको हैसियतमा प्राप्त सवारी सुविधा उनीहरूको पदावधि समाप्त भइसकेपछि पनि फिर्ता नगरेर तिनले दुरुपयोग गरिरहेका छन् ।
- लोकतान्त्रिक समाजवादी पार्टीका एक पूर्वसांसदले त पार्टीको सचेतकका हैसियतमा पाएको सवारी सुविधा पार्टी नै छाडेर अन्यत्र गइसकेपछि पनि प्रयोग गरिरहेका छन् ।
नेपालको राजनीतिमा अहिले देखिएको विकृति र विसङ्गतिको मूल कारण यिनै घटिया पात्रहरूको जगजगी हो । संविधानको ‘पालन र संरक्षण’ गर्नु राष्ट्रपतिको ‘प्रमुख कर्तव्य’ मानिएको छ । तर, राष्ट्रपतिको पटकपटक संविधानको उल्लङ्घन गर्न हिचकिचाउँदिनन् ।
संविधानले राजनीतिक शक्तिहरूबीच सहकार्य हुनुपर्ने व्यवस्था गरेको छ । देशको कार्यकारी प्रमुख प्रधानमन्त्री पदमा पुगेका व्यक्तिहरूमा सहकार्यको संस्कारै देखिएन ।
पूर्वप्रधानमन्त्री खड्गप्रसाद ओलीले दम्भ र अहङ्कारको एकलकाटे बाटो रोजे भने बहालवाला प्रधानमन्त्री शेरबहादुर देउवामा पनि संविधानले अपेक्षा गरेको सद्भाव र सहकार्यको संस्कार छैन ।
जनताले चुनेका प्रतिनिधिले निर्माण गरेको नेपालको संविधान, २०७२ पूर्णतः लोकतान्त्रिक छ । संविधानमै संघीयता, धर्मनिरपेक्षता र गणतन्त्रको सुनिश्चितता गरेको छ । समावेशी सामाजिक न्यायको सिद्धान्त संविधानले आत्मसात् गरेको छ ।
अर्थात्, नेपालको राजनीतिक प्रणाली अहिले जति उन्नत यसअघि कहिल्यै थिएन । संसारका कुनै पनि देशको संविधानसँग दाँज्न सकिने संविधान छ । दुर्भाग्य, यही संविधान कार्यान्वयन गर्ने बेलामा भने नेपालको राजनीतिका सबैभन्दा घटिया पात्रहरू प्रभावशाली हुन पुगे ।
यसको दोष संविधान वा व्यवस्थालाई दिनु भने न्यायोचित हुँदैन । विकृतिका कारकहरू समसामयिक राजनीतिमा प्रभाव जमाउन पुगेका पात्रहरू नै हुन् । यसैले देशको उत्थान र उद्धारका लागि राजनीतिक परिदृश्यबाट घटिया पात्रहरूलाई पन्छाउनु पर्ने देखिन्छ ।
चुनावको घोषणा भइसकेको छ । ठूलै खण्डखातिर नपरे चुनाव हुने नै छ । नेपाली जनताले मतदानका बेला विवेक प्रयोग गरे भने पक्कै पनि समस्याको जरो उखेलिनेछ । अहिलेको वा पहिलेको भन्दा धेरै राम्रो शासन पाउने हक नेपाली जनताको छ ।
