क्विटो । ग्वायाकिलको बन्दरगाहमा गरिएको प्रहरी कारबाहीमा ३.५ टन कोकिन बरामद गरिएको इक्वेडर प्रहरीले शुक्रबार जानकारी दिएको छ ।

सो परिमाणको कोकिन ८८ वटा सुटकेसमा प्याक गरिएको थियो । लागुऔषध बेल्जियम पठाउन लागिएको केराको कन्टेनरमा लुकाइएको अवस्थामा बरामद गरिएको इक्वेडरका प्रहरी कमान्डर जनरल भिक्टर जराटेले बताएका छन् । सन् २०२२ मा मात्र इक्वेडरमा १४४ टन लागुऔषध बरामद गरिएको छ ।

इक्वेडरका राष्ट्रपति गुइलेर्मो लासोले आफ्नो देशमा लागुऔषध तस्करीविरुद्ध लडाइँको घोषणा गरेका छन् ।

बुधबार संयुक्त राष्ट्रसंघको महासभामा आफ्नो भाषणमा लासोले लागुपदार्थको तस्करीविरुद्ध लड्न अन्तर्राष्ट्रिय सहयोगका लागि आह्वान गर्दै ‘अन्तर्राष्ट्रिय अपराधको लागि अन्तर्राष्ट्रिय समाधान चाहिने’ उल्लेख गरेका थिए । रासस/सिन्ह्वा