झ्यालबाट देखिने भीमसेनस्तम्भ 
धरहरा देखिँदैन अचेल 
केवल 
धरहराझैँ अग्लिएको
मान्छेको घमण्ड देखिन्छ
इमान हराएको बेइमान देखिन्छ । 
कि देखिन्छ 
खानलाई मात्रै बाँचिरहेका 
नैतिकता हराएको एक हुल मान्छे !

सहरमा
नैतिकता कतै भेटिँदैन किन ?

सहरलाई 
आचरणको झ्यालबाट नियाल्दा 
रुन्चे अनुहार लगाएको आकाश देखियो 
सहरमाथि मडारिएको
हिंस्रक कालो बादल देखियो 
भन्नुपर्दा,
सहर त नैतिकवान् हुनुपर्ने होइन र ?
झ्यालको पनि बानी सुध्रिनुपर्ने होइन र ?
विडम्बना नै भन्नुपर्छ
हुनुपर्ने पनि भएन 
सुध्रिनु पर्ने पनि सुध्रिएन ।

मात्र सहर
दीर्घ रोगीझैँ जीर्ण भएर बाँचेको छ
झन्–झन्,
अचेल
इतिहास हराएको झ्यालबाट 
सिंगो 
नैतिकता हराउँदै गरेको सहर देखिन्छ ।
०००
(फुटुङ, काठमाडौं)