काठमाडौं । वैकल्पिक राजनीतिको खोजी गर्दै साझा पार्टी गठन गरेका रवीन्द्र मिश्र विवेकशील साझा हुँदै राप्रपामा जाने पक्का भएको छ । आफ्नै नेतृत्त्वमा साझा पार्टी गठन गरेका मिश्रले विवेकशील नेपाली पार्टीसँग एकता गरी विवेकशील साझ पार्टी बनाएका थिए ।
 
वैकल्पिक राजनीतिको खोजीका लागि गठित विवेकशील साझामा उनले विचारभन्दा माथि देश भन्दै संघीयता, धर्म निरपेक्षता र गणतन्त्रको विकल्प खोज्नेगरी विचार अघि सारेपछि उनी पार्टीभित्रै आलोचित भएका थिए । चर्को आलोचना गर्नेलाई पार्टीबाटै निकालेर आफ्नो विचारमा अडिग रहेका उनले स्थानीय तह निर्वाचनको परिणाम पार्टीका लागि लज्जास्पद भएपछि ‘म खुइलिए’ भन्दै अध्यक्षबाट राजीनामा दिएका थिए । त्यसअघिदेखि नै राप्रपा अध्यक्ष लिंगदेनसँग भेटघाट गर्दै आएका मिश्र राजीनामा पछि भने राप्रपाको एकता गर्नेगरी संवाद थालेका थिए ।
 
अहिले राप्रपाले उपाध्यक्ष बुद्दिमान तामाङको नेतृत्वमा वार्ता समिति बनाएर कुराकानी गरिरहेको छ । पछिल्लो पटकको वार्तामा उनी वरिष्ठ उपाध्यक्ष पद लिएर राप्रपा प्रवेश गर्न तयार भएको स्रोतले जनाएको छ ।
 
यद्यपि, राप्रपा अध्यक्ष राजेन्द्र लिङदेनले मिश्रलाई राप्रपामा स्वागत गर्ने अन्तिम तयारी भए पनि पदको टुंगो भने लागि नसकेको बताए । केही दिनमै पदको टुंगो लगाएर औपचारिक समारोहसहित उनलाई भित्र्याउने अन्तिम तयारी भने भइरहेको उनले जानकारी दिए ।
 
“यो पदमा रहने भनेर सहमति भइसकेको छैन । तर, एउटै पार्टीमा रहने भन्ने समझदारी भइसकेको छ,” पार्टी काममा जनकपुरमा रहेका लिङदेनले बाह्रखरीसँग भने, “हाम्रो विचार र उद्देश्य एउटै भएकाले केही दिनभित्रै उहाँलाई स्वागत गर्ने तयारीमा छाैँ ।” उनले रवीन्द्र आगामी निर्वाचन राप्रपाबाटै लड्ने पनि जानकारी दिए ।
 
बीबीसी नेपाली सेवामा प्रमुखको भूमिका निर्वाह गरेका रवीन्द्र मिश्र प्रष्ट वक्ता मानिन्छन् । बीबीसीमै रहँदा छदम नाममा राजतन्त्रका पक्षमा आर्टिकल छपाउने उनले धेरैपछि मात्र त्यो लेखक आफू भएको खुलासा गरेका थिए । बीबीसीमा प्रगतिशील धारमा अन्तरर्वार्ता लिने उनी खरो स्वभाव र प्रष्ट वक्ताका रुपमा स्थापित थिए । 

वैकल्पिक राजनीतिक संस्कार स्थापना गर्ने गरी पार्टी खोलेका उनी अन्ततः निर्दलीय पञ्चायतको उत्तराधीकारी पार्टीमा पुग्ने निश्चित भएको छ ।