काठमाडौं । नेकपा (एकीकृत समाजवादी)ले २४ सदस्यीय सचिवालय गठन गरेको छ । पार्टी कार्यालय आलोकनगरमा मंगलबार सम्पन्न पार्टीको स्थायी कमिटी बैठकले पार्टीको केन्द्रीय सचिवालय गठन गरेको हो ।

सचिवालयमा अध्यक्ष, सम्मानित नेता, वरिष्ठ नेता, वरिष्ठ उपाध्यक्ष, उपाध्यक्ष, महासचिव, उपमहासचिव र सचिवसहित २४ जना रहने छ ।

त्यस्तै, संविधान संशोधनका लागि सुझाव दिन कार्यदल गठन गरेको छ । संविधान संशोधनबारे अध्ययन गरेर सुझाव दिन उपाध्यक्ष प्रकाश ज्वालाको संयोजकत्वमा सात सदस्यीय कार्यदल गठन गरिएको हो । सुझाव कार्यदलमा गरिमा साह, गणेश विक, बलदेव चौधरी, रामचन्द्र यादव, घनप्रसाद गौतम र राजन राई छन् ।

बैठकले पार्टीको आगामी कार्ययोजनालाई संशोधनसहित पारित गरेको छ । कार्यविभाजनका सन्दर्भमा आएका सुझावहरूलाई अध्ययन गरी दुई दिनपछि टुंग्याउने उपाध्यक्ष जगन्नाथ खतिवडाले जानकारी दिए ।