काठमाडौं । चलचित्र ‘प्रेम गीत–३’को हिन्दी भर्सन नेपालमा प्रतिक्षित बनेको छ । चलचित्रको पोस्टर र ट्रेलर रिलिज भए पछि यो नेपालमा पनि प्रतिक्षित बनेको हो । 

तर, यसको हिन्दी भर्सनको सेन्सरलाई लिएर विवाद भएको छ । हिन्दी भाषामा स्वरांकन भएकाले यसले हिन्दी चलचित्र सरह नै सेन्सरमा प्रक्रिया अबलम्बन गर्नुपर्ने चलचित्र विकास बोर्डले बताएपछि विवाद उत्कर्षमा पुगेको हो । 

निर्माण पक्षले हिन्दीमा डब मात्रै भएको भन्दै हिन्दी भर्सनलाई पनि नेपाली चलचित्रसरह व्यवहार गर्न आग्रह गरेपछि विवाद झन चुलिएको छ । यद्यपि, निर्माता तथा निर्देशक सन्तोष सेनले सेन्सर सहज तरिकाले गरिदिन आग्रह गर्दै हिन्दी चलचित्र सरह १५ प्रतिशत विकास शुल्क तिर्न तयार रहेको बताएका छन् । 

उनले आज हिन्दी भर्सनको पनि सेन्सर हुने बताए । “हामीले आवश्यक कागजात उपलब्ध गराएकाले आज सेन्सर हुन्छ भन्ने विश्वास छ,” मुम्बइमा रहेका सन्तोष भन्छन्, “आज सेन्सर भएपछि शुक्रबार यसको हिन्दी भर्सन नेपालमा पनि रिलिज यही शुक्रबार नै हुन्छ ।” 

चलचित्र विकास बोर्डका सदस्य प्रकाश भट्टराईले सम्पूर्ण कागजात प्राप्त भएको खण्डमा सेन्सर हुने बताए । “सेन्सरका लागि आवश्यक प्रक्रिया पुगेको अवस्थामा सेन्सर पास हुन्छ,” उनले भने, “यस अगाडि नै केही कागजात उपलब्ध गराइसकेको भन्नेछ । त्यसैले बाँकी प्रक्रिया पूरा गरेको हो भने सेन्सरबाट चलचित्र जाँचपास हुन्छ ।”

सन्तोष सेनको निर्माण रहेको चलचित्रमा प्रदीप खड्का मुख्य भूमिकामा छन् । सन्तोष स्वयं र छेतेन गुरुङको निर्देशन रहेको चलचित्र ‘प्रेम गीत–३’ हिन्दीमा डबिङ भएर भारतमा प्रदर्शन हुन लागेको पहिलो नेपाली चलचित्र हो ।