काठमाडौं । नेपाल पञ्चाङ्ग निर्णायक विकास समितिले बडादसैँको टीकाको शुभसाइत सार्वजनिक गर्ने तयारी गरेको छ । समितिले चाडपर्वहरूको उत्तम साइत सार्वजनिक गर्ने गर्छ ।

समितिले यो वर्षको बडादसैँको टीका, महानवमी, महाअष्टमी, फूलपाती, घटस्थापनालगायत कार्यको साइत सार्वजनिक गर्ने तयारी गरेको हो । हरेक वर्ष दसैँ आउनु केही दिनअघि उत्तम साइत सार्वजनिक गर्ने गरिन्छ ।

समितिका कार्यकारी निर्देशक सूर्यप्रसाद ढुंगेलका अनुसार पर्सि (शुक्रबार)सम्म दसैँको शुभसाइत सार्वजनिक गर्ने तयारी छ ।

“निर्णयका लागि हामी बैठक बसिरहेका छौँ । आज पनि बैठक छ । भोलि पनि बैठक बस्नेछ । छलफल गरिरहेका छौँ,” ढुंगेलले बाह्रखरीसित भने, “आज, भोलि, पर्सिसम्म निर्णय हुनसक्छ । त्यसपछि साइत सार्वजनिक गर्छौँ ।”