काठमाडौं । नेपाली राष्ट्रिय महिला फुटबल टोलीका मुख्य स्ट्राइकर सावित्रा भण्डारीलाई डेंगी भएपछि आज हुने श्रीलंकाविरुद्धको खेल गुमाउने भएकी छन् । 

सावित्रालाई हिजोबाट डेंगी भएको एन्फा स्रोतले जनाएको छ । यसअघि टिमकी मिडफिल्डर मञ्जली कुमारी योञ्जनलाई पनि डेंगी भएको थियो । जसका कारण मञ्जलीले भुटानविरुद्धको खेल गुमाएकी थिइन् । मञ्जलीले आज पनि नखेल्ने पक्का छ । 

सावित्राले भुटानविरुद्ध दुई गोल गरेकी थिइन् । सावित्राको अनुपस्थित आज नेपालका लागि महंगो सावित हुन सक्छ । नेपालले आज सेमिफाइनल प्रवेशका लागि समूह ‘बी’को अन्तिम खेलमा श्रीलंकाविरुद्ध खेल्न लागेको हो । पछिल्लो खेलमा भुटानले श्रीलंकामाथि ५–० को सनसनीपूर्ण विजय हासिल गरेपछि प्रतियोगितामा समूह ‘बी’को समीकरण रोमाञ्चक बनेको छ । साफ च्याम्पियनसिपमा भुटानको त्यो पहिलो जित थियो । नेपाल र भुटानको समान तीन अंक छ । तर, भुटानले दुई खेल खेलिसकेको छ । 

आज श्रीलंकाले जितेमा उसको पनि तीन अंक हुनेछ । तर, श्रीलंकालाई पाँच गोल गर्नु पर्नेछ । अन्यथा गोलअन्तरमा नेपालले सेमिफाइनलमा स्थान बनउनेछ । बराबरी गरेमा नेपाल समूह विजेता बन्नेछ । 

नेपालले पहिलो खेलमा भुटानलाई ४–० ले हराएको थियो । आज नेपालले त्रिपुरेश्वरस्थित दशरथ रंगशालामा श्रीलंकाविरुद्ध साँझ ५ः३० बजे खेल्नेछ । नेपाल लगातार दोस्रो जितको खोजीमा छ । नेपाल चार पटकको विजेता टोली हो । २०१६ मा नेपाल सेमिफाइनलबाट बाहिरिएको थियो । 

समूह ‘ए’बाट भारत र बंगलादेशले अन्तिम चारमा स्थान पक्का गरिसकेका छन् । माल्दिभ्स र पाकिस्तान भने प्रतियोगिताबाट बाहिरिसकेका छन् । दुई खेलबाट भारत र बंगलादेशले समान ६ अंक जोडेका छन् ।