काठमाडौं । नाबालिग बलात्कारको आरोप लागेका नेपाली राष्ट्रिय क्रिकेट टोलीका निलम्बित कप्तान सन्दीप लामिछानेविरुद्ध प्रहरी अनुसन्धान जारी छ ।

लामिछानेले यही भदौ ५ गते राति नगरकोट घुमाएर राति काठमाडौं होटलमा ल्याएर बलात्कार गरेको एक किशोरीको प्रहरीमा जाहेरी दिएकी छन् । सन्दीपविरुद्ध पक्राउ पुर्जीसमेत जारी भइसकेको छ ।

सन्दीपले नाबालिक किशोरीलाई सुरुमा ‘नगरकोटमै बसौँ’ भनेर दबाब दिएको उनीविरुद्धको जाहेरीमा उल्लेख छ ।

गएको मंगलबार साँझ प्रहरी वृत्त गौशालामा आफूमाथि बलात्कार भएको भन्दै एक १७ वर्षीया किशोरीले सन्दीपविरुद्ध जाहेरी दिएकी हुन् । जाहेरी दिने किशोरी सन्दीपकै साथीको साथी रहेको खुलेको छ । सन्दीपकै साथीले उनीहरू दुईजनाबीच चिनजान गराइदिएकी थिइन् ।

काठमाडौंको ‘होटल काठमाडौं इन’मा राति सन्दीपले ती किशोरीलाई पटक–पटक बलात्कार गरेको उजुरीमा उल्लेख छ । प्रहरीका अनुसार सो होटलको सीसीटिभी फुटेजमा पनि सन्दीप र पीडित किशोरी सँगै देखिएका छन् ।

तर, नगरकोटमा बसेको होटलको सीसीटिभी फुटेज भने फेला पर्न सकेको छैन । प्राविधिक समस्याका कारण फुटेज ‘स्टोर’ नरहेको बताइएको छ ।

तर, प्रहरीले काठमाडौं र नगरकोट दुवै होटलका कर्मचारीसँग सोधपुछ गरिरहेको छ । परिसर काठमाडौंका प्रमुख एसएसपी भरत बोहरा सन्दीपविरुद्धका प्रमाण संकलनमा प्रहरी सक्रिय रहेको बताउँछन् ।

एसएसपी बोहराले भने, “प्रहरी प्रमाण संकलनमा छ । सन्दीप फेला पर्नेबित्तिकै पक्राउ पर्छन् । प्रहरीले अनुुन्धानलाई निरन्तरता दिएको छ ।”

पीडित किशोरीले प्रहरीलाई दिएको जानकारीअनुसार त्यो दिन उनी होस्टेल फर्कन चाहन्थिन् । तर, राति आठ बजेपछि होस्टेल बन्द हुने भएकाले सन्दीपले उनलाई सँगै बस्न दबाब दिएका थिए । 

सन्दीपले नगरकोटबाट फर्कने क्रममा होटेल काठमाडौं इनमा फोन गरेर कोठा ‘बुक’ गरेका थिए । आफूले दुई कोठा लिन आग्रह गरेको र सन्दीपले नमानेको किशोरीको जाहेरीमा उल्लेख छ ।

होटेल काठमाडौं इनको सीसीटीभी फुटेजमा उनीहरू राति ११ः५५ बजे होटेल प्रवेश गरेको देखिएको छ । बिहान ६ः४५ मा दुवैजना सँगै बाहिर निस्किएको देखिएको छ ।

सन्दीप क्यारेबियन प्रिमियर लिग खेल्न वेस्ट इन्डिजमा छन् । तर, उनलाई क्यानले निलम्बन गरेसँगै उनले आफू नेपाल फर्किने र कानुनी लडाइँ लड्ने बताएका छन् ।

सन्दीपविरुद्ध जाहेरी दिने किशोरीको घर नुवाकोट हो । उनी काठमाडौंको बागबजारको एक कलेजमा अध्ययनरत छिन् । सन्दीप र ती किशोरीबीच एक महिनाअघि मात्र चिनजान भएको थियो ।

भदौ ६ गते सन्दीपसहितको टोली क्रिकेट श्रृंखलाका लागि केन्या प्रस्थान गरेको थियो । त्यहाँ नेपालले पाँच खेलको ट्वान्टी–२० शृंखला खेलेको थियो । जसको नेतृत्व सन्दीपले गरेका थिए ।

प्रहरी परिसर काठमाडौं र प्रहरी वृत्त गौशालाबाट संयुक्त रूपमा खटिएको टोलीले घटनाको अनुसन्धान गरिरहेको छ । सन्दीप विश्व क्रिकेटका उदीयमान ‘लेग स्पीनर’ हुन् । २२ वर्षीय सन्दीपले हालसम्म नेपालका लागि ३० अन्तर्राष्ट्रिय एकदिवसीय र ४४ ट्वान्टी–२० अन्तर्राष्ट्रिय खेल खेलेका छन् ।