काठमाडौं । रंगशालामा समर्थक बिरामी भएपछि झन्डै ५० मिनेट रोकिएको खेलमा बार्सिलोनाले शनिबार राति स्पेनिस ला लिगामा कार्डिजलाई ४–० ले हराएको छ । 

खेल सकिन १० मिनेटभन्दा कम समय बाँकी थियो । तर, एक्कासी खेल रोकिएको थियो । १९ हजारभन्दा धेरै दर्शक उपस्थित रंगशालामा एक जना समर्थक अचानक बिरामी भएपछि उनलाई प्राथमिक उपचारपछि अस्पताल लगिएको थियो । 

खेल रकिँदासम्म बार्सिलोनाले २–० को अग्रता लिइसकेको थियो । पाहुना टोली बार्सिलोनाले फ्रांक डी जोङको गोलबाट ५५ औँ मिनेटमा अग्रता लिएको थियो । ६५ औँ मिनेटमा रोबर्ट लेवानडोस्कीले बार्सिलोनाको अग्रता दोब्बर बनाए । ५० मिनेट रोकिएर खेल सुरु भएपछि बार्सिलोनाले थप दुई गोल थप्यो । 

खेल सकिन चार मिनेट बाँकी हुँदा अंसु फातीले गोल गरे भने इन्जुरी समयमा ओसमाने डेम्बेलेले अर्को गोल थपे । फाती र डेम्बेले दुवैको गोलमा लेवानडोस्कीले अवसर सिर्जना गरिदिएका थिए । 

ला लिगामा बार्सिलोनाको लगातार चौथो जित हो । पाँच खेलबाट १३ अंक जोडेको बार्सिलोना शीर्ष स्थानमा उक्लिएको छ । जुन दोस्रो स्थानको रियाल मड्रिडभन्दा एक अंकले माथि हो । तर, रियालले एक खेल कम खेलेको छ । पराजित कार्डिज अंकविहीन छ । 

ला लिगाको अन्य खेलमा एट्लेटिको मड्रिडले सेल्टा भिगोलाई ४–१ ले हरायो । घरेलु टोली एट्लेटिकोको जितमा एन्जेल कोरेरा, रोड्रिगो डी पाउल, यानिक कारास्कोले गोल गरेका थिए भने अर्को युनाई नुनेजको आत्मघाती गोल उपहार पाएको थियो । सेल्टा भिगोका लागि गाब्रियल भेगाले गोल गरेका थिए । 

पाँच खेलबाट १० अंक जोडेको एट्लेटिको चौथो स्थानमा छ । पराजित सेल्टा भिगो सात अंकका साथ ११ औँ स्थानमा छ । अन्य खेलमा सेभियाले स्पानियोललाई ३–२ ले हराउँदा रायो भायोकानोले भ्यालेन्सियालाई २–१ ले हरायो । त्यस्तै जिरोनाले रियाल भालाडोलिडलाई २–१ ले हरायो ।