काठमाडौं । नेकपा (एमाले)ले कलाकार अपूर्व क्षितिज सिंहको रिहाइको माग गरेको छ । प्रतिनिधिसभाको आजको बैठकमा सुरुमै समय लिएका एमाले प्रमुख सचेतक विशाल भट्टराईले अपूर्व क्षितिजलाई रिहा गर्न माग गरे । उनले मन्त्रीलाई कर्के नजरले हेर्दा सुरक्षा गार्ड पक्राउ पर्ने अवस्था रहेको भन्दै कलाकारमाथिको दमन बन्द गर्नुपर्ने बताए ।
 
“सभामुख महोदय, एकजना कलाकार अपूर्व क्षितिज सिंहले केही दिनअघि आफ्नो फेसबु्कमा पोष्टमा आफ्नो हास्यव्यंग्य राखेवापत हास्यव्यंग्य गरेवापत दश दिनदेखि थुनामा छन्,” भट्टराईले भने, “हुन त यो मुलुकमा मन्त्रीलाई यस्सो कर्के नजर लगाएर हेर्यो भने पनि सुरक्षा गार्ड पक्राउ पर्ने देश हो । अहिले त्यो खालका मन्त्रीहरु सत्तामा आसिन हुनुहुन्छ ।” 

भट्टराईले अहिले देखिएको अवस्थाले लोकतान्त्रिक समाजमाथि नै प्रश्न उठाइरहेको बताए । 

“कला प्रस्तुत गर्ने क्रममा अलिकति हास्य प्रस्तुतिका क्रममा केही कसैलाई मर्का पर्‍यो होला । कसै न कसैलाई मर्का पारिरहेकै हुन्छ, हास्य प्रस्तुतिमा,” भट्टराईले भने, “हामीले देखेका छौँ, शीर्ष नेताहरुले प्रज्ञाभवन र सभागृहमा बसेर आफ्ना आलोचना हाँसी हाँसी सुनेको । अनि यसवापत नै एउटा कलाकारलाई यो सरकार दश दिनदेखि थुनिरहेको छ । म उहाँको रिहाइको जोडदार माग गर्दछु ।” 

यसअघि नै अपूर्व क्षितिजले पोष्टमार्फत क्षमायाचना गरेर पोष्ट डिलिटसमेत गरिसकेको भन्दै भट्टराईले कालकारमाथिको दमन बन्द हुनुपर्ने बताए ।