काठमाडौं । प्रधानमन्त्री शेरबहादुर देउवाले आन्दोलनका सम्पूर्ण कार्यक्रम स्थगित गरी निर्वाचनको तयारीमा सरकारलाई सहयोग गर्न कर्मचारीहरूलाई आग्रह गरेका छन् ।
आइतबार काठमाडौंमा नेपाल निजामती कर्मचारी युनियनले गरेको कार्यक्रममा प्रधानमन्त्री देउवाले संघ र प्रदेशको निर्वाचन नजिकिँदै गएको अवस्थामा सरकारलाई सहयोग गर्न आग्रह गरेका हुन् ।
उनले कर्मचारीका जायज माग सम्बोधन गर्दै छिट्टै संघीय निजामती ऐन ल्याउने प्रतिबद्धता जनाए । ऐनको सन्दर्भमा आएका सुझावहरूका बारेमा आफू जानकार रहेको भन्दै उनले समयसापेक्ष सुधार गरिने बताए ।
स्थायी सरकारका रूपमा रहेको निजामती सेवा सरकारको राज्य सञ्चालनको नजिकको संयन्त्र भएको पनि उनले बताए ।
यस्तै, नेपाली कांग्रेसका नेता रामचन्द्र पौडेलले संविधान परिवर्तनीय दस्तावेज भएको भन्दै कर्मचारीका जायज मागलाई सम्बोधन हुने गरी ऐनलाई अन्तिम रूप दिइनुपर्ने बताए ।
कार्यक्रममा कर्मचारीहरूले आफूहरूको वृत्तिविकासका लागि सरकारले विशेष ध्यान दिनुपर्ने बताएका थिए ।