रुस (मस्को) । एकजना वरिष्ठ रुसी कूटनीतिज्ञले युक्रेनलाई लामा दुरीका हातहतियार आपूर्ति नगर्न अमेरिकालाई शुक्रबार चेतावनी दिएका छन् । 

रुसी उपविदेशमन्त्री सर्गेइ र्‍याबकोभले अमेरिकाले यसरी हतियार उपलब्ध गराएर युद्धमा आफ्नो प्रत्यक्ष संलग्नताको सन्तुलन मिलाइरहेको पनि बताएका छन् । साथै उनले यदि रुसले आफ्नो सार्वभौमिकतामा खतरा महसुस गरेको स्थितिमा सैन्य नीतिअनुसार आणविक हतियार प्रयोगबारे सोच्न सक्ने बताएका छन् । 

सरकारी टेलिभिजनमा बोल्ने क्रममा र्‍याबकोभले भनेका छन्, “यदि अमेरिकाले युक्रेनमा निरन्तर हतियार प्रवाह गरेको खण्डमा आउन सक्ने परिणामहरूबारे हामीले पटकपटक चेतावनी दिइसकेका छौँ । अमेरिकाले प्रभावकारी ढंगले आफूलाई युक्रेन युद्धको एक पक्ष भन्न सकिने स्थितिमा उभ्याइसकेको छ । रुसले आफ्ना लक्ष्य प्राप्ति नहुने बेलासम्म युक्रेनमा आक्रमण जारी राख्नेछ ।” 

अमेरिकाले हिमार्स मल्टिपल रकेट लन्चर्स उपलब्ध गराएपछि युक्रेनी सेनाको प्रमुख भौतिक पूर्वाधार र अन्य लक्ष्यमा प्रहार गर्ने क्षमतामा वृद्धि भएको छ । 

एपीबाट ।