मस्को । रूस, चीन र भारतको त्रिपक्षीय सैन्य युद्ध अभ्यासमा गोर्खा सैनिक पनि सहभागी हुने भएका छन् । 

युक्रेनमा आफ्नो आक्रमणलाई लिएर अमेरिका र यसका सहयोगीहरूले आफूलाई एक्लो पार्न गरेको प्रयासविरूद्ध रूसले चीन र भारतसँग बिहीबारदेखि ठूलो सैन्य अभ्यास गर्न लागेको अन्तर्राष्ट्रिय सञ्चारमाध्यमले जनाएका छन् ।

उक्त सैन्य अभ्यासमा भारतीय सेनामा कार्यरत गोर्खा सैनिक सहभागी हुने अन्तर्राष्ट्रिय समाचार संस्था ब्लुमबर्गले जनाएको छ । अमेरिकाले भारतलाई रक्षा साझेदार बनाउन खोजेको छ र युक्रेनको युद्धमा रूसमाथि लगाइएका अन्तर्राष्ट्रिय प्रतिबन्धहरूलाई कमजोर नगर्न आग्रह गर्दै आएको छ । 

यस्तोमा नयाँ दिल्लीले अभ्यासका लागि गोर्खा सैनिकसहित ७५ सदस्यीय टोली पठाएको ब्लुमबर्गले टिप्पणी गरेको छ । जसमा भारतीय नौसेना र वायु सेनाका अधिकारीहरुको पनि सहभागिता रहनेछ । 

रूसमा सञ्चालन हुने साताव्यापी ‘भोस्तोक–२०२२’ युद्ध खेलमा १४० भन्दा बढी विमान र ६० वटा युद्धपोतसहित ५० हजारभन्दा बढी सेना सहभागी हुनेछन् । उक्त अभ्यासमा नौसैनिक अभ्यास ‘सी अफ जापान’मा आयोजना गरिनुका साथै पाँच हजार थान सैन्य उपकरण प्रयोग हुने रूसी सेनाले जनाएको छ ।

नियमित अभ्यास भनिएको उक्त कार्यक्रममा संघाई कोअपरेसन अर्गनाइजेसन र पूर्वसोभियत गणराज्यहरुको संगठन कलेक्टिभ सेक्युरिटी ट्रिटी अर्गनाइजेसनले संगठनका सदस्य राष्ट्रहरू र साझेदारहरूलाई एकसाथ ल्याउन लागेको हो ।

यसअघि, अभ्यासमा सहभागी भइसकेको भारतले रूस–युक्रेन युद्धमा रूसको पक्ष लिनबाट जोगिँदै आएको छ । त्यसो त रूस भारतको मुख्य हतियार आपूर्तिकर्ता पनि हो । 

यता, बेइजिङस्थित रक्षा मन्त्रालयले सैन्य समन्वयलाई सुदृढ पार्ने उद्देश्यका साथ अभ्यासमा चीनको सेना, वायु र जलसेनाले भाग लिएको जनाएको छ । चिनियाँ कम्युनिष्ट पार्टी समर्थित ग्लोबल टाइम्सले यस वर्षको अभ्यास विशेष गरी प्रशान्त क्षेत्रमा अमेरिकाबाट हुने सम्भावित खतराहरूमा केन्द्रित हुने बताइएको छ ।