साहित्य
काठमाडौंको मौसमको तुलना
अरू कुनै पनि सहरसँग गर्न सकिन्न
मौसमका हिसाबले
स्वर्ग नै हो काठमाडौं ।
यो अर्कै कुरा हो
कि जताततै फोहरको डंगुर छ
के गर्नु हजुर !
फोहरको राजनीति साह्रै फोहोरी छ
तर, काठमाडौं स्वर्ग नै हो ।
प्रदूषण छ चाहिनेभन्दा अलिक बढी
ट्राफिक जामले पनि दिक्क लाउँछ
पानी र बिजुलीको त कुरै नगर्नु बेस
यी सबै कुरालाई एकातिर राखेर हेर्ने हो भने
काठमाडौं त स्वर्ग नै हो ।
हजुर ! अचेल म सकारात्मक मात्र सोच्न थालेको छु
ढिलो–चाँडो फोहरको व्यवस्थापन होला
प्रदूषण घट्ला, धारामा पानी आउला
बिजुलीको के दुःख– बेच्नै थालेपछि
अनि सबैभन्दा मुख्य कुरो
काठमाडौंको मौसम साह्रै राम्रो छ
वास्तवमा काठमाडौं त स्वर्ग नै हो ।
०००
प्रकाशित मिति: शनिबार, भदौ ११, २०७९ ०५:५५
प्रतिक्रिया दिनुहोस्