मुम्बई । यतिबेला बलिउडमा खडेरी परिरहेको छ । एकपछि अर्को ठूला बजेटका चलचित्रहरु बक्स अफिसमा कमजोर प्रमाणित भइरहेका छन् भने सामाजिक सञ्जालमा बलिउड बहिष्कार अभियान सुरु भइसकेको छ ।

लगातार फिल्म फ्लप हुने र सामाजिक सञ्जालमा बहिस्कारको समस्यासँग जुझिरहेको बलिउड फिल्म उद्योगमा फेरि अर्को समस्या आइपरेको छ । चलचित्रका ज्यालादारी मजदुरहरुले काम ठप्प गरी आन्दोलनमा उत्रिएका छन् ।

चलचित्रमा दैनिक ज्यालादारी गर्ने मजदुर युनियनले एउटा सूचना जारी गर्दै पारिश्रमिक नदिने निर्माताहरुसँग काम नगर्ने घोषणा गरेका छन् । नवभारत टाइम्सका अनुसार मजदुरहरुले सँगै काम नगर्ने भनेका निर्माताहरु बलिउडका ए–ग्रेड कलाकारहरुले अभिनय गरेका चलचित्र अनि वेब सिरिजका निर्माताहरु हुन् ।
 
मजदुरहरुले पछिल्लो तीन महिनादेखि ज्याला नदिएका निर्माताहरुविरुद्ध सूचना जारी गरेका हुन् । फिल्म स्टुडियो सेटिङ एण्ड अलाइड मजदुर युनियनका महासचिव गंगेश्वर श्रीवास्तवले माग पूरा नभएसम्म आन्दोलन गर्ने र ज्याला नियमति दिने हो भने काम गर्न कुनै समस्या नरहेको बताएका छन् ।

“हाम्रो सदस्यहरु ज्यालामा काम गर्नेहरु हुन् । यस्तोमा उनीहरुको पेमेन्ट १ हप्तासम्म रोकिए सामान्य नै हो भन्न सकिन्छ । तर, तीन महिनासम्म पेमेन्ट पाइरहेका छैनन्, जुन एकदम गलत हो । त्यसैले युनियन अगाडि आउने निर्णयसहित यस्तो पहल गरेका हौँ,” श्रीवास्तवले भने, “यस संघको स्थापना नै कामदारहरुको अधिकार सुनिश्चित गर्नका लागि भएको हो । उनीहरुको ज्याला नियमति दिने हो भने हामी (युनियन) बीचमा आउने छैनौँ ।”

यता निर्माताहरुले उल्टै युनियनमाथि आरोप लगाएका छन् । युनियनले कामदारहरुको ज्याला युनियनमार्फत दिनुपर्छ भन्ने रणनीति रचेको निर्माताहरुको आरोप छ । 

युनियनका अनुसार हालै रिलिज भएको एउटा ठूलो बजेटको चलचित्रका निर्मातासँग मजदुरहरुको भारु ८० लाखको हिसाबकिताब बाँकी छ ।