मस्को । रुसले राष्ट्रपति भ्लादिमिर पुटिनका निकतटम सहयोगीमध्ये एककी छोरीको हत्याका लागि युक्रेनी विशेष सेवालाई आरोप लगाएको छ । 

क्रेमलिनको प्रोपोगन्डाकर्ताको रूपमा पनि चिनिने २९ वर्षीया पत्रकार दार्या दुगिनाको शनिबार राजधानी मस्को नजिक आफैँले हाँकिरहेको कारमा विस्फोटन हुँदा ज्यान गएको थियो । 

उनका अति–राष्ट्रवादी पिता अलेक्जान्डर दुगिन रुसी राष्ट्रपति पुटिन निकटका व्यक्ति भएकाले पनि उनको हत्या गरिएको हुनुपर्ने अनुमान गरिएको छ । 

रुसको संघीय सुरक्षा सेवा (एफएसबी)ले आफूले यस हत्याकाण्डको रहस्य सुल्झाएको र यसमा युक्रेनको प्रत्यक्ष हात रहेको दाबी गरेको छ । 

युक्रेनी अधिकारीहरूले यस घटनामा आफ्नो कुनै हात नरहेको बताइसकेका छन् । 

तर, रुसी सञ्चार माध्यमले सार्वजनिक गरेको एफएसबीको एक विज्ञप्तिमा भने युक्रेनी विशेष सेवाले हत्याका लागि भडामा लिएका एकजना महिला पेशेवर हत्यारा जुलाईको मध्यतिर आफ्नी सानी छोरीसँगै रुस आइपुगेको जनाएको छ । 

ती महिलाले दुगिनको जीवन र दिनचर्याबारे बुझ्नका लागि उनी बस्ने अपार्टमेन्टमै एउटा कोठा भाडामा लिएको तथा आफूले हाँक्ने मिनी कूपर कारमा तीनवटा छुट्टाछुटै लाइसेन्स प्लेट प्रयोग गर्ने गरेको बताइएको छ । 

विस्फोटको घटनापछि उनी इस्टोनियातर्फ भागिसकेको पनि एफएसबीले जनाएको छ । 

शनिबार साँझ दुगिना आफ्नो पितासँग मस्को नजिक आयोजित एक महोत्सवमा सहभागी भएकी थिइन् । सो कार्यक्रममा उनका दार्शनिक पिताले प्रवचन दिएका थिए । तिनीहरूले एउटै कारबाट फर्कने योजना अन्तिम समय परिवर्तन गरेका थिए । 

अनुसन्धानकर्ताहरूले उनको टोयोटा ल्यान्ड क्रुजरमा विस्फोटक पदार्थ राखेर विस्फोट गराइएको जनाएका छन् । 

बीबीसीबाट ।