हेलसिन्की । फिनल्यान्डकी प्रधानमन्त्री सान्ना मरिनले उन्मुक्त तरिकाले पार्टी मनाइरहेको एउटा भिडियो फुटेज सार्वजनिक भएपछि अहिले उनी व्यापक आलोचनाको सिकार भएकी छन् । 

सामाजिक सञ्जालबाट लिइएको हुनुपर्ने सो भिडियोमा उनी आफ्ना साथी र अन्य फिनिस चर्चित व्यक्तित्वहरूसँग नाचगान गरिरहेको देखिन्छिन् । 

उनको विपक्षी राजनीतिक पार्टीहरूबाट आलोचना भइरहेको छ । एकजना नेताले उनको लागुऔषध परीक्षण हुनुपर्ने आवाज उठाएका छन् । 

तर, ३६ वर्षीया मरिनले आफूले लागुऔषध सेवन नगरेको दाबी गरेकी छन् । उनले आफूले रक्सी मात्र पिएको र दिल खोलेर पार्टीमा रमाइलो गरेको बताएकी छन् । 

उनी विश्वकै सबैभन्दा कम उमेरको सरकार प्रमुख भएकी थिइन् । अहिले यो उपाधि चिलीका राष्ट्रपति गाव्रियल बोरिकको पोल्टामा गएको छ । 

मरिनले पार्टी मनाउने कामलाई गोप्य राख्ने गरेकी छैनन् । साथै संगीत महोत्सवहरूमा पनि उनले प्रायः तस्बिर खिचाउने गरेकी छन् । 

गतवर्ष कोभिड–१९ संक्रमणको नजिक पुग्दा उनले आफू क्लबमा धाउने गरेकोमा सार्वजनिक रूपमा क्षमायाचना गरेकी थिइन् । 

गतसाता मात्र उनलाई जर्मन न्युज आउटलेट बिल्डले ‘विश्वकै सबैभन्दा बढी फेसनेवल प्रधानमन्त्री’को संज्ञा दिएको थियो । 

बिहीबार सो भिडियोबारे उनले यसरी टिप्पणी गरेकी छन्, “पार्टीमा मेरो भिडियो खिच्दै गरेको मलाई थाहा थियो । तर, त्यो भिडियो सार्वजनिक गरिएकोमा मलाई दुःख लागेको छ ।”

बीबीसीबाट ।