काठमाडौं । पाकिस्तानका सूचना तथा प्रसारणमन्त्री अताउल्लाह तरदारले पूर्वप्रधानमन्त्री इमरान खानको पार्टी पाकिस्तान तेहरिक–ए–इन्साफ (पीटीआई)ले हिंसाको राजनीति बढाएको आरोप लगाएका छन् । पीटीआईको प्रदर्शन कहिल्यै शान्तिपूर्ण नरहेको उनको आरोप छ ।

उनले पीटीआईका कार्यकर्ताले नोभेम्बर २६ मा इस्लामावादमा आधुनिक हतियार, स्टेन गन, अश्रु ग्यास र ग्रेनेडसहित हिंसा फैलाएको आरोप लगाएका छन् । अताउल्लाहले ९ मे र २६ नोभेम्बरलाई पाकिस्तानको इतिहासमा सबैभन्दा कालो दिनको रूपमा व्याख्या गरे ।

"पीटीआईले शवको राजनीति गर्न चाहन्छ । देशमा अशान्ति फैलाएर आफ्नो राजनीतिक स्वार्थ पूरा गर्न चाहन्छ," उनले भने ।

जेलमा रहेका पीटीआईका संस्थापक इमरान खानले सरकारले देशलाई जातीय आधारमा विभाजन गरेको जवाफ फर्काएका छन् । एक्समार्फत इमरानले सरकारले जातीय आधारमा पश्तूनहरूलाई निशाना बनाएको बताएका छन् ।

इमरानले ‘फुटाउ र राज गर’को नीतिको हिस्सा नबन्न अपिल पनि गरेका छन् । यसबाहेक इमरानले सरकारलाई अवज्ञा आन्दोलन (सरकारको अवज्ञा) गर्ने चेतावनी पनि दिएका छन् ।

इमरानले सरकारसमक्ष दुई प्रमुख माग पनि राखेका छन् । त्यसमध्ये पहिलो गत वर्षको मे ९ र यस वर्षको नोभेम्बर २६ मा भएको हिंसाबारे सर्वोच्च अदालतका वरिष्ठ न्यायाधीशको अध्यक्षतामा छानबिन गरिनुपर्ने माग छ । दोस्रोमा गैरकानूनीरूपमा जेलमा परेका पीटीआई कार्यकर्ता र नेताहरूलाई रिहा गरिनुपर्ने माग छ ।

नोभेम्बर २६ मा भएको हिंसामा चार प्रहरीसहित सात जनाको मृत्यु भएको थियो ।

द प्रिन्टबाट ।