काठमाडौं । अमेरिकन आइडल फाइनलिस्ट नेपाली मूलका गायक दिवेश पोखरेल उर्फ आर्थर गनले सम्पूर्ण नेपाली समर्थकका लागि अमेरिकादेखि नेपाल आएको बताएका छन् ।
यही शनिबारदेखि हुने ‘टुबोर्ग होमकमिङ आर्थर गन’का लागि उनी नेपाल आएका छन् ।
उनको नेपालमा हुन गैरहेको पहिलो सांगीतिक यात्राबारे जानकारी दिन बिहीबार गरिएको पत्रकार सम्मेलनमा बोल्दै उनले नेपालमा भएका आफ्ना समर्थकहरूका लागि सांगीतिक प्रस्तुति दिन नेपाल आएको बताए ।
आफ्ना नेपाली समर्थकहरूलाई आर्थरले यसरी सम्बाेधन गरे, “सम्पूर्णमा न्यानो नमस्कार, नेपालमा बसेर मेरो गीतहरू सुनिदिनुभएका र अमेरिकन आइडलमा जाँदा मलाई सपोर्ट गरिदिनुभएका सम्पूर्ण नेपालीहरूका लागि अमेरिकाबाट नेपाल प्रस्तुति दिन आएको छु ।”
बुधबार (१७ अगस्ट) नेपाल आइपुगेका दिवेश एक महिना नेपाल बस्नेछन् । दिवेश सांगीतिक प्रस्तुति मात्र नभइ नेपालको पर्यटन, संस्कृति र संगीत तीनवटै क्षेत्रको प्रवर्द्धन गर्नका लागि नेपाल आएको आयोजक ब्रेनसर्भिसिका निर्देशक तथा संस्थापक रिसम महर्जनले बताए ।
“दिवेश जुनजुन सहरमा कन्सर्टका लागि जानेछन् त्यहाँ कन्सर्टको साथै त्यस ठाउँको पर्यटकीय एवं महत्वपूर्ण सांस्कृति रीतितिथिलाई पनि डकुमेन्ट गर्नेछौँ । हामीले यसलाई एउटा प्रस्तुतिको रूपमा मात्रै नभएर नेपालको पर्यटन प्रवर्द्धनलाई टेवा पुग्नेछ भन्ने उद्देश्य राखेका छौँ,” रिसमले भने ।
संगीत ‘युनिभर्सल ल्यांग्वेज’ भएको भन्दै यसमार्फत पनि पर्यटन प्रवर्द्धन गर्न सकिने दिवेशले विश्वास व्यक्त गरे ।
उनको नेपाल टुर यही अगस्ट २० (शनिबार) काठमाडौंको क्लब प्लाटिनमबाट सुरु हुँदैछ । त्यसपछि अगस्ट २४ मा चितवन, अगस्ट २६ मा पोखरा र त्यसपछि अगस्ट ३१ मा बुटवलमा हुने तय छ ।
सेप्टेम्बरको कार्यक्रम तालिका भने तय हुन बाँकी नै छ । उपत्यकामा उनको क्लब प्लाटिनम र ससःत्वा गरी दुई ठाउँमा हुनेछ ।
उनले ७ सहरमा जम्मा ९ वटा प्रस्तुति दिँदैछन् ।
नेपाल कलाकौशल अनि प्राकृतिक सम्पदा दुवैले धनी भएको भन्दै आन्तरिक र बाह्य पर्यटकलाई अझै आकर्षित गर्न आफूहरूको यो सांगीतिक टुर र त्यसको डकुमेन्ट्रीले पनि सहयोग गर्ने विश्वास दिवेशले राखेका छन् ।
आफूलाई अमेरिकन आइडलको उपाधि जिताउन नेपालमा रहेका सबैले ठूलो प्रयास गरिदिएकोमा निकै खुशी र नेपाली भएकोमा गर्वान्वित महसुस गरेका छन् ।
आर्थरको सुरक्षा र मनसुनलाई ध्यानमा राख्दै उनका सबै कन्सर्ट इन्डोर गर्न लागेको आयोजकले बतायो ।
अमेरिकन आइडल भएपछि पहिलो पटक नेपाल आएका उनी स्वयं पनि एकदमै उत्साहित छन् । यसअघि आउँदा आफूलाई कसैले नचिनेको तर अहिले सबै नेपालीले चिन्ने भएकाले यो पटक नेपाल आउँदा धेरैको मायाका साथै न्यानो स्वागत पाएको दिवेशले बताए ।
कन्सर्टमा उनले आफैँले लेखेका नेपाली र अंग्रेजी भाषाका गीतहरू गाउनेछन् । उनलाई नेपाल टुरमा उनीसँगै आएका अमेरिकाकै उनका तीन जना ब्यान्ड सदस्यहरूले साथ दिँदैछन् ।
यसका साथै दिवेशको जनरासँग मिल्ने केही स्थानीय ब्यान्डहरूलाई पनि कन्सर्टमा प्रस्तुति दिन लगाउने आयोजकले जनाएको छ ।
वास्तविक नाम दिवेश पोखरेल भएपनि उनको स्टेज नाम भने आर्थर गन हो । उनले आफ्नो सामाजिक सञ्जालमा पनि आर्थर गन नै राखेका छन् । यीमध्ये कुन नाम प्रिय भन्दा पनि प्रिय हिसाबले बोलाए दुवै नाम प्रिय नै लाग्ने उनले बताए ।
सात वर्षअघि अमेरिका गएका दिवेश २०१८ मा व्यक्तिगत कामका लागि नेपाल आएका थिए । त्यसबेला उनले नेपालका थुप्रै नाम चलेका क्लब अनि बारहरूमा प्रस्तुति दिएका थिए ।
तर, त्योबेला उनी आएको र गएको कसैले पत्तै पाएनन् । त्यसपछि फेरि अमेरिका फर्किएका उनले सन् २०२० को अमेरिकन आइडलमा भाग लिएसँगै एकाएक चर्चामा आएका हुन् ।
अमेरिका संगीतको हिसाबले राम्रो ठाउँ भएको भन्दै यदि आफूसँग खुबी अनि लगन भए अर्को मुलुकमै भएपनि आफ्नो प्यासनलाई अगाडि बढाउन सक्ने दिवेशले बताए । र, उनले प्रमाणित पनि गरिरहेका छन् । उनी अमेरिकन आडलको तेस्रो स्थान बनाउन सफल रहे ।
नेपालपछि उनको अस्ट्रेलिया टुर पनि तय भैसकेको छ ।