वासिङटन । अमेरिकी प्रथम महिला जिल बाइडेनमा कोभिड–१९ पोजिटिभ देखिएको मंगलबार उनका प्रवक्ताले जानकारी दिएकी छन् । 

नियमित स्वास्थ्य परीक्षणको क्रममा अघिल्लो दिन उनको कोभिड–१९ परीक्षण नेगेटिभ भएपनि साँझतिर उनमा हल्का खोकीको लक्षण देखिएको जिल बाइडेनका संवाद निर्देशक एलिजावेथ अलेक्जान्डरले बताएकी छन् । 

एलिजावेथले एक विज्ञप्तिमार्फत भनेकी छन्, “र्यापिड एन्टिजेन टेस्टमा उनी पुनः नेगेटिभ देखिइन् । तर, उनको पीसीआर टेस्ट भने पुनः पोजिटिभ देखियो ।”

७१ वर्षीया प्रथम महिलाले दुवै मात्रा खोप र दुवै मात्रा बुस्टर डोज पनि लिएकी थिइन् । 

एलिजावेथले भनेकी छन्, “अहिले उनमा हल्का लक्षण देखिएका छन् । उनलाई अहिले प्याक्लोभिड सेवन गराइएको छ भने रोग रोकथाम तथा नियन्त्रण निकायको निर्देशिकाअनुसार उनलाई कम्तीमा पाँच दिन आइसोलेसनमा राखिनेछ ।”

प्रथम महिला अहिले साउथ क्यारोलिनास्थित आफ्नै निजी निवासमा रहेकी छन् । त्यहाँ उनी र राष्ट्रपति बाइडेनसँगै बिदा मनाइरहेकी थिइन् । जो बाइडेन आफैँ पनि हालै मात्र कोभिड –१९ बाट मुक्त भएका हुन् । 

मुद्रा अवमूल्यन कटौती विधेयकलाई कानुनी रूप दिन हस्ताक्षरका लागि उनको मंगलबार अपरान्ह वासिङटन डीसी फर्कने कार्यक्रम थियो । 

राष्ट्रपति बाइडेन पहिलोचोटि २१ जुलाईमा कोरोना पोजिटिभ भेटिएका थिए । उनलाई पनि उनकै निजी चिकित्सक केभिन ओ कोन्नरले प्याक्स्लोभिड सिफारिस गरेका थिए । 

पाँच दिनको आइसोलेसनपछि उनी दुई पटक नेगेटिभ देखिएपछि ओभल अफिस फर्केका थिए । तर, ३० जुलाईमा उनी पुन कोभिड–१९ पोजिटिभ देखिएका थिए ।