मुम्बई । मुम्बईको तटमा बुधबार साँझ एउटा डुंगा पल्टिँदा दुईजनाको मृत्यु भएको छ । करिब ७७ जनालाई उद्धार गरिएको छ र बेपत्ता अन्य पाँचजनाको खोजी कार्य जारी रहेको अधिकारीहरूले बताएका छन् ।

अधिकारीका अनुसार पाँच चालक दलका सदस्यसहित ८५ जना चढेको डुंगा एलिफेन्टा टापुतर्फ जाँदै गर्दा साँझ ६ः३० बजे कारन्जाको उराननजिकै दुर्घटना भएको हो ।

दुईजनाको शव फेला परेको छ भने खोजी कार्य भारतीय कोस्ट गार्ड (आईसीजी) जहाजले गरिरहेको छ । “मुम्बईको तटमा डुंगा दुर्घटनामा ७७ जनाको उद्धार गरिएको छ भने दुईजनाको शव निकालिएको छ,” कोस्ट गार्डले जानकारी दिएको छ । 

बृहन्मुम्बई म्युनिसिपल कर्पोरेसन (बीएमसी)का अनुसार जहाजमा चालक दलका सदस्यसहित कुल ८५ यात्रु थिए । “पाँचजना बेपत्ता छन् । उद्धार गरी अस्पतालमा भर्ना गरिएका पाँचजनाको अवस्था गम्भीर छ । बाँकीको अवस्था स्थिर छ,” बीएमसी अधिकारीहरूले बताए ।

महाराष्ट्रका मुख्यमन्त्री देवेन्द्र फडणविसले भने, “हामीले एलिफन्टातर्फ गइरहेको नीलकमल डुंगा दुर्घटना भएको खबर प्राप्त गरेका छौँ । नौसेना, तटरक्षक र प्रहरी टोलीबाट डुंगा तुरुन्तै सहायताको लागि पठाइएको छ । हामी जिल्ला प्रहरी प्रशासनसँग निरन्तर सम्पर्कमा छौँ । अधिकांश यात्रुको उद्धार गरिएको छ । यद्यपि उद्धार कार्य जारी छ । सञ्चालनका लागि आवश्यक सबै स्रोत परिचालन गर्न जिल्ला प्रशासनलाई निर्देशन दिइएको छ ।”
 
यसैबीच, महाराष्ट्रका उपमुख्यमन्त्री एकनाथ सिन्देले अधिकारीहरूलाई भारतीय तटरक्षक र स्थानीय पुलिसद्वारा सुरु गरिएको उद्धार कार्यलाई तीव्रता दिन निर्देशन दिए । रासस