काठमाडौं । गत आर्थिक वर्ष (आव) २०७८/०७९ मा कुल वस्तु आयात २४.७ प्रतिशतले वृद्धि भएको छ । नेपाल राष्ट्र बैंकका अनुसार गत आवको असार मसान्तसम्म १९ खर्ब २० अर्ब ४५ करोड रुपैयाँको वस्तु आयात भएको छ । अघिल्लो वर्ष यस्तो आयात २८.७ प्रतिशतले बढेको थियो ।

वस्तु आयात गरिने मुलुकका आधारमा भारत, चीन तथा अन्य मुलुकबाट भएको आयात क्रमशः २३.५ प्रतिशत, १३.२ प्रतिशत र ३६.३ प्रतिशतले वृद्धि भएको छ । वस्तुगत आधारमा पेट्रोलियम पदार्थ, औषधि, कच्चा पाम तेल, स्पन्ज आइरन, सुनलगायतका वस्तुको आयात बढेको राष्ट्र बैंकले जानकारी दिएको छ । पछिल्लो समय एम.एस.बिलेट, सिमेन्ट, धान तथा चामल, दाल, मेडिकल उपकरणलगायतका वस्तुको आयात घटेको छ ।

त्यसैगरी कुल वस्तु निर्यात ४१.७ प्रतिशतले बढेको छ । अघिल्लो वर्ष यस्तो निर्यात ४४.४ प्रतिशतले वृद्धि भएको थियो । गन्तव्यका आधारमा भारत तथा अन्य मुलुकतर्फ भएको निर्यात क्रमशः ४५.९ प्रतिशत र ३०.४ प्रतिशतले वृद्धि भएको छ भने चीनतर्फको निर्यात २०.४ प्रतिशतले घटेको छ ।

वस्तुगत आधारमा पाम तेल, ऊनी गलैँचा, धागो (पोलिस्टर तथा अन्य), जिंक सिट, जुसलगायतका वस्तुको निर्यात बढेको छ भने सोयाबिन तेल, अलैँची, चिया, औषधि (आयुर्वेदिक), तार लगायतका वस्तुको निर्यात घटेको छ ।

निर्याततर्फ कन्चनपुर भन्सार कार्यालयबाहेकका प्रमुख नाकाबाट गरिएको निर्यात असार मसान्तसम्म वृद्धि भएको छ । आयाततर्फ भने सम्पूर्ण प्रमुख नाकाबाट भएको आयातमा वृद्धि भएको राष्ट्र बैंकको तथ्यांक छ ।