काठमाडौं । गणपूरक संख्या नपुगेपछि आइतबार प्रतिनिधिसभाको बैठक स्थगित गरिएको छ ।

आजको बैठकमा सार्वजनिक ऋण व्यवस्थापन विधेयक पारित गर्न लाग्दा नेमकिपाका सांसद प्रेम सुवालले गणपूरक संख्याका विषयमा प्रश्न उठाएका थिए । त्यसपछि तीन मिनेट घण्टी बजाएर सांसद संख्या यकिन गर्दा ६७ सांसद मात्र बैठकमा उपस्थित भए ।

गणपूरकका लागि एकचौथाइ अर्थात् अहिले ६९ सांसद आवश्यक पर्छ । त्यसपछि १५ मिनेटका लागि बैठक स्थगित गरिएको थियो ।

१५ मिनेटपछि पुनः बसेको बैठकमा सुवालले फेरि गणपूरक संख्या यकिन गर्न माग गरे । तीन मिनेट घण्टी बजाएर गणना गर्दा सांसद संख्या ६७ मात्र भएपछि सभामुख अग्निप्रसाद सापकोटाले बैठक स्थगित गरेका हुन् । अर्को बैठक यही साउन ३१ गतेका लागि बोलाइएको छ ।

आजै यसअघि बैठकमा काठमाडौं उपत्यका सार्वजनिक यातायात प्राधिकरण विधेयक निर्णयार्थ प्रस्तुत गर्न लाग्दा पनि सुवालले गणपूरक संख्याका विषयमा प्रश्न उठाएका थिए । त्यसपछि तीन मिनेट घण्टी बजाएर संख्या यकिन गरिएको थियो । त्यति बेला भने ९० सांसद उपस्थित थिए ।