सियोल । दक्षिण कोरियाको राजधानी सियोलमा अविरल वर्षाले आएको बाढीका कारण कम्तीमा आठजनाको मृत्यु भएको छ । १४ जना घाइते भएका छन् ।

सोमबार राति परेको भारी वर्षाले सडकहरू डुबानमा परेका छन् । मेट्रो स्टेसनहरू बाढीमा डुबेका र सहर तथा छिमेकी प्रान्तहरूमा बिजुली बत्ती गएको बीबीसीले जनाएको छ । 

कोरियाको मौसम विज्ञानकाअनुसार केही क्षेत्रहरूमा ८० वर्षमा सबैभन्दा बढी वर्षा भएको छ । वर्षा अझै केही दिन जारी रहने मौसमविद्ले बताएका छन् ।

बाढीको पानी मेट्रोको सिँढीहरू बगिरहेको, पार्क गरिएका कारहरू डुबेको र मानिसहरूले घुँडा–अग्लो पानीमा सडक पार गरिरहेको तस्बिरहरू देख्न सकिन्छ । 

स्थानीय रिपोर्टहरूकाअनुसार तीनजना बाढी पीडितहरू बन्जिहा भनेर चिनिने अर्ध–बेसमेन्ट अपार्टमेन्टमा बसिरहेका थिए । उद्धार अधिकारीहरूले सडकमा बाढीको पानी कम्मरसम्म पुगेकाले अपार्टमेन्टमा पुग्न नसकिएको बताएका छन् ।

बीबीसीबाट ।