काठमाडौं । नर्भिक इन्टरनेसनल अस्पतालले नियमविपरीत बनाएका टहरा आजै भत्काउने भएको छ ।

काठमाडौं महानगरपालिकाको २४ घण्टे ‘अल्टिमेटम’अनुसार भत्काउने महानगरका नगर प्रहरी प्रमुख धनपति सापकोटाले बताए । “नियमविपरीत अनधिकृत रूपमा बनाएका टहरा साढे २ बजे भत्काउन आउँदैछौँ,” सापकोटाले भने ।

महानगर सहरी व्यवस्था विभागले सोमबार सूचना जारी गर्दै अस्पतालले लिजमा लिएको जग्गाको पश्चिमतर्फ निर्माण गरेका संरचना २४ घण्टाको अल्टिमेटम दिएको थियो ।

अस्पतालले सरकारको नाममा रहेको कित्ता नम्बर २०८५ क्षेत्रफल १–८–१–८ जग्गा लिजमा लिई सरकारसँगको सम्झौताविपरीत र नक्सापास स्वीकृत नगरी टहरा बनाएको सूचनामा उल्लेख छ ।

तर, अस्पतालले अत्यावश्यक बिरामीको उपचारका लागि चाहिने संवेदनशील सामग्री राखेको भन्दै २४ घण्टामै टहरा भत्काउन नसकिने जनाएको छ ।