बैंकक । दक्षिणपूर्वी थाइल्यान्डको छोन्वुरी प्रान्तस्थित एउटा नाइटक्लबमा आगलागी हुँदा कम्तीमा १४ जना मानिसको ज्यान गएको छ । करिब ४० जना घाइते भएका छन् ।

स्थानीय समयअनुसार शुक्रबार बिहान १ बजे सात्ताहिप जिल्लाको माउन्टेन बि नाइटस्पोटमा आगलागी सुरु भएको थियो । भिडियो फुटेजमा मानिसहरू चिच्याउँदै भागिरहेको र केहीको लुगामा पनि आगो लागेको देखिन्छ ।

आगो लाग्नुको कारण पत्ता लाग्न सकेको छैन । उद्धारकर्मीहरूले भित्तामा रहेका ज्वलनशील पदार्थको कारण आगलागीले झनै चर्को रूप लिएको बताएका छन् । राजधानी बैंकक देखि १ सय ५० किमी टाढाको छोन्वुरीको सो एक तले नाइट क्लबको क्षेत्रफल ४ हजार ८ सय वर्ग मिटर रहेको छ । 

स्थानीय सञ्चार माध्यमले आगो नियन्त्रणमा ल्याउन अग्निनियन्त्रकहरूले दुई घन्टा भन्दा बढी संघर्ष गरेका थिए । त्यहाँ संगीत बजाउँदै गरेका बेला आगोमा जलेर मरेका एकजना कलाकारकी आमाले संगीत प्रस्तुति भइरहेको समय आगो लागेको बताएकी छन् । अधिकांश पीडितका लाश मुख्य द्वार नजिक र बाथरुमहरूमा फेला परेका छन् । 

बीबीसीबाट ।