काठमाडौं । पाकिस्तानको बलुचिस्तान प्रान्तमा पाँच सयहाराहारी यात्रुले भरिएको रेलमा सशस्त्र चरमपन्थीद्वारा आक्रमण गरी रोकिएको छ । पृथकतावादी समूह बलुच लिबरेसन आर्मी (बीएलए)ले आक्रमणको जिम्मेवारी लिएको छ। यो हमला क्वेटाबाट पेसावर जाँदै गरेको जाफर एक्सप्रेसमा भएको हो ।

बीएलएले जारी गरेको विज्ञप्तिमा भनिएको छ, ‘हामीले सिब्बी जिल्लामा रेलमा हमला गर्नुअघि रेलवे ट्र्याकलाई विस्फोट गराएका थियौँ । रेल अहिले हाम्रो कब्जामा छ।’ पाकिस्तानी प्रहरीले दिएको जानकारी अनुसार आक्रमणमा रेल चालकसहित तीनजना घाइते भएका छन् । 

सरकारी प्रवक्ता साहिद रिन्दले घटनास्थलमा सुरक्षाकर्मीहरू पठाइएको बताए । बलुचिस्तान सरकारका प्रवक्ताले बताएअनुसार रेलमा भारी गोलीबारीको रिपोर्ट आएको छ। बलुच लिबरेसन आर्मीले ट्रेनमा सवार धेरै यात्रु र सुरक्षा बलका कर्मचारीहरू आफ्नो कब्जामा रहेको र यदि उनीहरूविरुद्ध कुनै कारबाही गरियो भने गम्भीर परिणाम भोग्नुपर्ने दाबी गरेको छ।

क्वेटाका एक वरिष्ठ रेलवे अधिकारी मुहम्मद कासिफले रेलमा चार सयदेखि पाँच सय यात्रु रहेको बताए । रेलवे सुरक्षा अधिकारी जिया कक्कडले उक्त क्षेत्रमा नेटवर्क समस्या भएकाले रेल चालक दलका सदस्यसँग सम्पर्क गर्न नसकेको बताए ।

सञ्चारमाध्यममा जारी विज्ञप्तिमा सरकारी प्रवक्ताले सिब्बी अस्पतालमा आपतकालीन घोषणा गरिएको र घटनास्थलमा एम्बुलेन्स पठाइएको जानकारी दिएका छन् ।

सरकारी प्रवक्ताका अनुसार रेलवे विभागले घटनास्थलमा राहत ट्रेन पठाएको छ। पहाडी र दुर्गम क्षेत्र भएकाले घटनास्थल पुग्न कठिनाइ भइरहेको छ ।

क्वेटा जिल्ला अस्पतालका प्रवक्ता डाक्टर वसिम बेग्लेले बीबीसीलाई दिएको जानकारी अनुसार सिब्बी र क्वेटाका प्रमुख अस्पतालहरूमा आपतकालीन अवस्था लागु गरिएको छ। घाइतेको उपचारका लागि विशेष वार्ड निर्माण गर्न र अस्पतालका कर्मचारीलाई तयारी गर्न निर्देशन दिइएको छ ।

उनले सिब्बी अस्पतालमा १०० जना बिरामीको उपचार गर्ने सुविधा रहेको तर गम्भीर घाइतेलाई क्वेटा पठाइने बताए ।

जाफर एक्सप्रेसमा सवार यात्रुका परिवारले क्वेटा रेलवे स्टेसनको काउन्टरबाट जानकारी लिन खोजिरहेका छन्। आज बिहान क्वेटाबाट लाहोरका लागि प्रस्थान गरेका यात्रुसँग दिउँसो २ बजेदेखि सम्पर्क हुन नसकेको उनीहरूका परिवारजनले बताएका छन् ।