सार्वजनिक सेवामा रहेका कर्मचारीलाई पार्टीका कार्यकर्ता र कर्मचारीको दोहोरो भूमिका अपनाउन आह्वान गर्नु संविधान र लोकतान्त्रिक मान्यताको उपहास हो । राज्यको ढुकुटीबाट तलब खाने कर्मचारीलाई दलगत राजनीतिमा संलग्न गराउनु राजनीतिक अनैतिकता हो ।
 
नेपाल कम्युनिस्ट पार्टी ९एमाले०का वरिष्ठ उपाध्यक्षले सार्वजनिक संस्थाका कर्मचारीहरूको एउटा संगठनलाई सम्बोधन गर्ने क्रममा कर्मचारीलाई दोहोरो भूमिका अपनाउन भनेका छन् । अरू दलका नेताहरूमा पनि कर्मचारीलाई कार्यकर्ता बनाउने निरंकुश मनोवृत्ति कम छैन ।
 
त्यसो त प्रमुख दलहरू सबैले सार्वजनिक निकायका कर्मचारीको आआफ्ना संगठन बनाएका छन् । जनताको करबाट तलब खाएर दलगत संगठनमा संलग्न हुने कर्मचारीहरूको चुरीफुरी नै बढी हुन्छ । 
 
संविधानले कर्मचारीहरूलाई पनि संगठित हुने अधिकार दिएको छ । संगठनहरू सैद्धान्तिकरूपमा राजनीतिक दलहरूप्रति निकट हुनु पनि अस्वाभाविक होइन । तर, राज्यको तलब खाएर दल विशेषको पक्षमा सक्रिय हुनु भने अक्षम्य अनैतिकता हो । 
 
संविधानले कर्मचारीलाई संगठनको अधिकार आफ्नो समुदायको हित गर्नका लागि दिएको हो ।  तर, राजनीतिक दलका नेताले र तिनका पिछलग्गु कर्मचारीले त्यसको चरम दुरुपयोग गरे । यसले देशको अहित त गरेको छ नै स्वय‌ं तिनै दलहरूको पनि भलो हुनेछैन ।
 
राजनीतिमा नैतिकतालाई पन्छाउँदा निस्कने परिणामको एउटा उदाहरण ‘एम अधिकारी’सम्बन्धी विवाद नै हो । एम अधिकारीको पहिचान गर्न सरकार अनिच्छुक देखिए पनि जनमानसले त किटान गरिसकेको छ ।
 
नेपालका राजनीतिक दलका नेताहरू खोला तर्दा अरूको बुई चडेको तस्बिर सामाजिक सञ्जालमा निकै व्याप्त भएको थियो । समानताका निम्ति सङ्घर्ष गरेको गुड्डी हाँक्नेहरू अशक्त नभए पनि अरूको बुईमा बोकिएको देख्नेहरूले कटु आलोचना पनि गरेका थिए ।  
 
जनस्तरमा हुने यस्ता आलोचनालाई नेपालका राजनीतिक नेताले खासै महत्त्व दिने गरेको देखिएको छैन । यसैले पछिल्ला दिनहरूमा पनि उनीहरूको आचरणमा कुनै सुधार भएको छैन । अहिले पनि नेताहरू अरूकै खर्चमा बाँच्न र अरूकै बुईमा बोकिन रमाउँछन् ।
 
अरूको बुईमा रमाउने राजनीतिक दलका नेताहरूको भुइँफुट्टा चरित्र तिनको दलका संगठन र संरचनामा पनि प्रतिविम्बित हुन्छ । सम्भवतः यस्तै प्रवृत्तिका कारण जनस्तरमा राजनीतिक नेतृत्वप्रति चरम वितृष्णा बढ्दै गएको हो ।
 
अहिलेका राजनीतिक दलका प्रमुख नेताहरूबाट नैतिकता र लोकतान्त्रिक आचरणको अपेक्षा गर्ने ठाउँ नै बाँकी छैन । यसैले जनताको करबाट तलब खानेहरूले इमानदारी र नैतिकता देखाउनुपर्ने बेला भएको छ । 
 
कर्मचारी र दलका कार्यकर्ताको दोहोरो भूमिका अपनाउँदा द्वैध चरित्रको हुन पुगिन्छ । द्वैध चरित्रले देश र समाजलाई हानि हुन्छ भने व्यक्तिको पनि दीर्घकालीनरूपमा भलो हुँदैन । द्वैध चरित्रका व्यक्तिका कारण सन्तानले समेत शिर निहुराउनुपर्ने हुनसक्छ ।
 
यसैले सरकारी र सार्वजनिक संस्थाका कर्मचारी राज्यप्रति इमानदार हुनुपर्छ । दलगत संगठनमा सक्रिय हुन मन लागे जागिर छाडेर लाग्ने स्वतन्त्रता छ । आफूले अपनाएकै पेसाप्रति बेइमानी गर्नु त अनैतिक हुनु पनि हो ।
 
राजनीतिक दलका नेताहरूले पनि अब भूमिगत कालको नीति त्यागेर लोकतान्त्रिक संस्कार अपनाउनुपर्छ । अब पनि राजनीतिलाई बुई चड्ने र कमाई खाने बाटो बनाउन नछाडे जनताको चरम घृणाको सामना गर्नुपर्नेछ । चेतना भया ।